دبئی میں آپ کے بچے کا استاد کون ہے؟ والدین کے لیے اساتذہ کی قابلیت کا مکمل رہنما

خلیج اردو
دبئی میں نئے اسکول کی تلاش میں والدین عام طور پر جدید لیبارٹریاں، روشن کلاس رومز اور کھیل کے میدان دیکھ کر متاثر ہوتے ہیں، مگر سب سے اہم سوال یہ ہوتا ہے کہ ان کے بچوں کو پڑھانے والا استاد کون ہے اور کیا وہ واقعی اہل ہے؟ اسی پہلو کو مدنظر رکھتے ہوئے دبئی کی نالج اینڈ ہیومن ڈیولپمنٹ اتھارٹی (KHDA) نے سخت نئے قواعد متعارف کرائے ہیں تاکہ والدین کو مکمل اعتماد اور شفافیت مل سکے۔

ان ہدایات کے مطابق دبئی کے تمام نجی اسکولوں میں اساتذہ کے لیے واضح معیارات لازمی قرار دیے گئے ہیں جن میں تعلیمی قابلیت، پیشہ ورانہ تجربہ، حفاظتی چیک، اور لازمی تربیت شامل ہیں۔ اس اقدام کا مقصد یہ ہے کہ ہر استاد نہ صرف تعلیمی طور پر اہل ہو بلکہ بچوں کی فلاح و بہبود اور حفاظت کے حوالے سے بھی باخبر اور تیار ہو۔

اہم نکات درج ذیل ہیں:

* نرسری اساتذہ: بچوں (45 دن سے 35 ماہ) کے لیے لیول 3 QF امارات کی ڈگری درکار ہے، نئے اساتذہ کو چھ ماہ براہِ راست نگرانی میں رہنا ہوگا۔
* پری-کے جی/فاؤنڈیشن اسٹیج: 3 سے 6 سال تک کے بچوں کے لیے بیچلرز ان ایجوکیشن یا کسی بھی شعبے میں بیچلرز کے ساتھ لیول 3 ای سی ای کی ڈگری ضروری ہے، ساتھ ہی کم از کم ایک سال کا تدریسی تجربہ یا چھ ماہ کی زیر نگرانی تدریس لازمی ہے۔
* پرائمری اساتذہ: 6 سے 11 سال کے بچوں کے لیے بیچلرز ان ایجوکیشن یا کسی بھی مضمون میں بیچلرز کے ساتھ چھ ماہ کی زیر نگرانی پریکٹس اور کم از کم ایک سال کا تدریسی تجربہ۔
* ماہر مضامین کے اساتذہ (6 سے 18 سال): متعلقہ مضمون میں بیچلرز کی ڈگری اور ایک سال کا تدریسی تجربہ یا چھ ماہ کی نگرانی میں تدریس۔
* اسکول پرنسپل: ان کی تقرری KHDA کی آفیشل لیٹر کے بعد ہی قانونی طور پر درست ہوگی۔

مزید یہ کہ، پہلے سے کام کرنے والے اساتذہ کو 2028 یا 2029 تک اپنی قابلیت نئے معیار کے مطابق اپ گریڈ کرنا ہوگی۔

اساتذہ کی بھرتی سے پہلے لازمی جانچ پڑتال میں شامل ہے:

* KHDA کی ڈیریجسٹریشن لسٹ چیک کرنا
* دو پروفیشنل ریفرنسز
* کرمنل اور سیف گارڈنگ چیک
* اساتذہ کی ڈگریوں اور آن لائن پروفائل کا جائزہ

ہر استاد کے پاس کام شروع کرنے سے قبل درج ذیل دستاویزات ہونا ضروری ہیں:

* درست رہائشی ویزا
* تصدیق شدہ ڈگریاں
* یو اے ای پولیس کلیرنس سرٹیفکیٹ
* پچھلے پانچ یا دس سال کے دوران رہائش پذیر ممالک کے پولیس کلیرنس
* سائن کیا ہوا کوڈ آف کنڈکٹ

تمام اساتذہ کے لیے لازمی تربیت بھی شامل ہے، جس میں بچوں کی حفاظت، ہیلتھ اینڈ سیفٹی، رِسک مینجمنٹ، اسپیشل نیڈز کے طلبہ کے ساتھ کام کرنے اور کوڈ آف کنڈکٹ شامل ہیں۔

والدین اپنے بچوں کے اساتذہ کی قابلیت کے بارے میں براہِ راست اسکول سے تصدیق کرسکتے ہیں، جبکہ KHDA ان ریکارڈز کا باقاعدہ آڈٹ کرتا ہے۔

یہ ضوابط اس بات کی ضمانت دیتے ہیں کہ دبئی کے نجی اسکولوں میں صرف قابل، محفوظ اور باخبر اساتذہ ہی طلبہ کو تعلیم دیں گے، جو عالمی معیار کے مطابق تدریس اور بچوں کی فلاح دونوں پہلوؤں پر یکساں توجہ دیتے ہیں۔

Dubai tightens teacher qualification rules to reassure parents about school standards