خلیج اردو
ابوظہبی: متحدہ عرب امارات میں آج جمعہ 19 ستمبر کو موسم معتدل سے جزوی طور پر ابر آلود رہنے کی پیش گوئی کی گئی ہے۔ نیشنل سینٹر آف میٹیورولوجی (این سی ایم) کے مطابق مشرقی اور شمالی علاقوں میں وقفے وقفے سے بادل چھائے رہیں گے۔
محکمہ موسمیات نے خبردار کیا ہے کہ رات اور ہفتہ کی صبح کے دوران کچھ ساحلی علاقوں میں نمی کی سطح بڑھ سکتی ہے۔ صبح کے اوقات میں دھند کے باعث سرخ اور پیلے الرٹس جاری کیے گئے ہیں۔
ہلکی سے معتدل جنوب مغربی سے شمال مغربی ہوائیں چلیں گی، جن کی رفتار 10 سے 25 کلومیٹر فی گھنٹہ جبکہ جھکڑوں کے دوران 35 کلومیٹر فی گھنٹہ تک پہنچ سکتی ہے۔
دبئی اور ابوظہبی میں آج درجہ حرارت کم سے کم 30 اور زیادہ سے زیادہ 40 ڈگری سینٹی گریڈ رہنے کا امکان ہے۔ اسی طرح شارجہ میں درجہ حرارت 30 سے 39 ڈگری تک ریکارڈ کیا جائے گا۔
جمعرات کو ملک میں سب سے زیادہ درجہ حرارت الظفرہ ریجن کے مزیرعہ میں ریکارڈ کیا گیا جو 45.5 ڈگری سینٹی گریڈ تھا۔
محکمہ موسمیات کے مطابق خلیج عرب میں سمندر معمولی جبکہ بحیرہ عمان میں کبھی کبھار معتدل رہے گا۔
