
خلیج اردو
راولپنڈی: پاکستان کرکٹ ٹیم نے سری لنکا کو دوسرے ٹیسٹ میچ میں 8 وکٹوں سے شکست دے کر دو ٹیسٹ میچوں کی سیریز ایک صفر سے جیت لی۔ راولپنڈی کرکٹ اسٹیڈیم میں کھیلے گئے میچ میں قومی ٹیم نے 90 رنز کا معمولی ہدف دو وکٹوں کے نقصان پر حاصل کرکے شاندار کامیابی اپنے نام کی۔
پاکستان کو میچ کے چوتھے روز کامیابی کے لیے 90 رنز درکار تھے۔ قومی ٹیم نے ہدف کا تعاقب شروع کیا تو ابتدائی دو وکٹیں جلد گر گئیں، تاہم اس کے بعد اذان اویس اور عامر جمال نے ذمہ دارانہ بیٹنگ کرتے ہوئے ٹیم کو فتح سے ہمکنار کردیا۔ اذان اویس 32 رنز اور عامر جمال 34 رنز بنا کر ناٹ آؤٹ رہے۔ عامر جمال نے صرف 22 گیندوں پر جارحانہ بیٹنگ کرتے ہوئے ٹیم کی کامیابی میں اہم کردار ادا کیا۔
اس سے قبل سری لنکا کی ٹیم اپنی دوسری اننگز میں 316 رنز بنا کر آؤٹ ہوگئی تھی۔ مہمان ٹیم نے ابتدائی اننگز میں 98 رنز بنائے تھے، جس کے جواب میں پاکستان نے 325 رنز اسکور کرکے 227 رنز کی برتری حاصل کی تھی۔ دوسری اننگز میں سری لنکن بیٹرز نے بہتر مزاحمت دکھائی، تاہم پاکستانی بولرز نے اہم مواقع پر وکٹیں حاصل کرکے مہمان ٹیم کو بڑا مجموعہ بنانے سے روک دیا۔
پاکستان کی جانب سے محمد عباس اور عامر جمال نے دوسری اننگز میں تین، تین وکٹیں حاصل کیں۔ محمد عباس کو شاندار بولنگ پر میچ کا بہترین کھلاڑی قرار دیا گیا، جبکہ سیریز میں ان کی کارکردگی کے اعتراف میں انہیں مین آف دی سیریز کا اعزاز بھی دیا گیا۔
سیریز کے پہلے ٹیسٹ میچ کا فیصلہ نہ ہوسکا تھا اور مقابلہ ڈرا ہوگیا تھا، تاہم دوسرے ٹیسٹ میں کامیابی کے بعد پاکستان نے سیریز ایک صفر سے اپنے نام کرلی۔ وزیراعظم شہباز شریف نے بھی قومی ٹیم کو مبارکباد دیتے ہوئے کھلاڑیوں کی محنت، شاندار کارکردگی اور ٹیم ورک کو سراہا۔







