خلیج اردو
اسلام آباد:وفاقی حکومت نے تیل اور گیس کی چوری روکنے کیلئے اسمارٹ میٹر نصب کرنے پر غور شروع کردیا۔وزیراعظم نے شمسی توانائی کی ترویج پرتوجہ مرکوز کرنے کی ضرورت پر زوردیا۔تھر کول کی گیسی فکیشن کے حوالے سے حکمت عملی تیار کرنے کی بھی ہدایت کی۔
وزیراعظم کی زیر صدارت پیٹرولیم ڈویژن کے امور پر اہم اجلاس اسلام آباد میں منعقد ہوا۔ شرکاء سے گفتگو کرتے ہوئے شہباز شریف نے کہا کہ ہمیں متبادل توانائی کے ذرائع خصوصاً شمسی توانائی کی ترویج پر توجہ مرکوز کرنے کی ضرورت ہے۔ تھر کول کی گیسیفیکیشن کے حوالے سے حکمت عملی تیار کرنے کی ہدایت دیتے ہوئے کہا کہ تھر کول کی ملک کے دوسرے علاقوں تک رسائی کے لئے ریلوے لائین کے حوالے سے تمام ضروری اقدامات اٹھائے جائیں۔
اعلامیہ کے مطابق اجلاس کو بتایا گیا کہ متبادل توانائی پر مبنی مصنوعات کے فروغ کے ذریعے ماحولیاتی تبدیلی کے مضر اثرات پر قابو پانے کے لئے اقدامات اٹھائے جا رہے ہیں۔ ٹائیٹ گیس کی پیداوار میں اضافے کے حوالے سے لائحہ عمل تیار کیا جائے گا۔ تیل اور گیس پائپ لائنز سے چوری کے انسداد کے لئے اسمارٹ میٹرز کی تنصیب کی جائے گی۔ الیکٹرک بائیکس ،گاڑیوں اور بجلی پر چلنے والی گھریلو مصنوعات کے حوالے سے پالیسی پر کام کیا جا رہا ہے۔بائیو فیولز کے فروغ کے لئے بھی اقدامات اٹھائے جائیں گے۔
اعلامیہ میں بتایا گیا کہ پٹرولیم سیکٹر کو ڈی ریگولیٹ کرنے کے حوالے سے تجاویز پر کام کیا جائے گا ۔پیٹرول اور گیس کی تلاش کے عمل کو مکمل ڈیجیٹائز کیا جائے گا۔۔۔
