خلیج اردو
اسلام آباد: سپریم کورٹ میں تحریک انصاف کو بلے کے نشان کی واپسی کیلئے درخواست دائر کر دی گئی۔ انتخابی نشان کی واپسی کے بعد آزاد امیدواروں کو پی ٹی آئی جوائن کرنے کی اجازت دینے کی استدعا بھی کی گئی ہے۔
درخواست شہری انجینئر قاضی محمد سلیم نے دائر کی ۔ درخواست میں تحریک انصاف کو بلے کا نشان اور مخصوص نشستیں دینے کی استدعا کی گئی ہے۔
درخواست میں چیف جسٹس پاکستان جسٹس قاضی فائز عیسیٰ اور الیکشن کمیشن کو فریق بنایا گیا ہے۔ درخواست میں استدعا کی گئی ہے کہ پی ٹی آئی نے عام انتخابات میں انتخابی نشان کے بغیر حصہ لیا۔ اب انتخابی نشان واپس کیا جائے۔انتخابی نشان کی واپسی کے بعد آزاد امیدواروں کو پی ٹی آئی جوائن کرنے کی اجازت دی جائے۔
پی ٹی آئی کو متناسب نمائندگی کے اصول کے تحت مخصوص نشستیں فراہم کی جائیں۔ درخواست میں موقف اپنایا گیاکہ پی ٹی آئی نے عام انتخابات میں دیگر تمام جماعتوں سے زیادہ ووٹ حاصل کیے۔
درخواست گزار کا کہنا ہےکہ پی ٹی آئی نے عام انتخابات میں 1 کروڑ 84 لاکھ 60 ہزار سے زائد ووٹ حاصل کیے۔
