فضائی حدود بندش کے بعد یو اے ای میں پھنسے مسافروں کا حکام کے اقدامات پر اطمینان، مفت رہائش، خوراک اور سفری سہولیات فراہم کیے جانے پر مسافروں نے حکومت کو سراہا

خلیج اردو
فضائی حدود کی بندش کے باعث یو اے ای میں پھنسے مسافروں کو مفت رہائش، خوراک اور ٹرانسپورٹ فراہم کی گئی، متاثرہ سیاحوں نے حکام کے اقدامات کو مثالی قرار دیا۔

فضائی حدود کی بندش کے بعد متحدہ عرب امارات میں پھنس جانے والے ہزاروں مسافروں نے حکومتی اقدامات کو سراہتے ہوئے اسے "سب سے زیادہ معاون ملک” قرار دے دیا ہے۔

ابوظہبی ایئرپورٹ پر موجود ایک بھارتی انفلوئنسر، جو "دی آئی پیڈ انفورمیشن” کے نام سے بلاگ کرتے ہیں، نے بتایا کہ ہفتے کے روز پروازوں کی منسوخی کے بعد انہیں اور ان کے اہلِ خانہ کو مفت رہائش، خوراک اور ٹرانسپورٹ فراہم کی گئی۔ انہوں نے کہا، "ہم گزشتہ ہفتے Abu Dhabi آئے تھے اور ہفتے کو Bengaluru واپس جانا تھا، لیکن ایئرپورٹ پر معلوم ہوا کہ تمام پروازیں منسوخ ہو چکی ہیں۔”

انہوں نے مزید کہا کہ چند گھنٹوں بعد حکام نے انہیں خوراک اور ہوٹل واؤچرز فراہم کیے جبکہ اسکول بس کے ذریعے ہوٹل منتقل کیا گیا۔ "ہماری بہت اچھی دیکھ بھال کی گئی اور عملہ انتہائی معاون تھا، یو اے ای حکام نے مسافروں کے ساتھ جس طرح تعاون کیا وہ قابلِ تعریف ہے۔”

UAE General Civil Aviation Authority نے اعلان کیا ہے کہ متاثرہ اور پھنسے ہوئے مسافروں کی رہائش اور خوراک کے اخراجات حکومت برداشت کرے گی تاکہ ضروری خدمات کی فراہمی جاری رکھی جا سکے۔

اسی طرح Department of Culture and Tourism – Abu Dhabi نے دارالحکومت کے ہوٹلوں کو ہدایت دی ہے کہ پروازوں کی پابندیوں کے باعث سفر نہ کر سکنے والے مہمانوں کے قیام میں توسیع کی جائے۔

دریں اثنا Danube Properties نے عارضی طور پر مفت رہائش فراہم کرنے کی پیشکش کی ہے جس میں بچوں اور بزرگوں والے خاندانوں کو ترجیح دی جا رہی ہے، جبکہ Arabnb نے بھی دبئی میں پھنسے افراد کو مفت کمرے فراہم کرنے کا اعلان کیا ہے۔

سیاحوں کے مطابق اگرچہ میزائل حملوں کی آوازوں اور موبائل الرٹس نے خوف کی فضا پیدا کی، تاہم انہیں یو اے ای حکومت پر مکمل اعتماد ہے کہ وہ ان کی حفاظت یقینی بنائے گی۔

ماہرین کا کہنا ہے کہ ایسے اقدامات بحران کے دوران سیاحوں کے اعتماد کو برقرار رکھنے میں اہم کردار ادا کرتے ہیں۔