یو اے ای میں نومبر اور دسمبر کے لیے سات اہم اپ ڈیٹس: نئے قوانین، افتتاحات اور تعطیلات کا اعلان

خلیج اردو
دبئی: متحدہ عرب امارات میں سال کے آخری دو ماہ مختلف نئے قوانین، اہم میوزیمز کے افتتاح اور قومی تقریبات سے بھرپور ہوں گے۔ نومبر اور دسمبر 2025 میں ٹریفک کے نئے ضوابط، ثقافتی سرگرمیوں، اسکولوں کی تعطیلات اور دبئی شاپنگ فیسٹیول جیسے بڑے ایونٹس کے باعث ملک بھر میں رونقیں بڑھ جائیں گی۔

دبئی میں ڈیلیوری بائیکس کے لیے نئی لین پابندی
پہلی نومبر سے دبئی روڈز اینڈ ٹرانسپورٹ اتھارٹی (RTA) اور دبئی پولیس نئے قوانین نافذ کرے گی جن کے تحت ڈیلیوری بائیکس کو تیز رفتار بائیں لینوں پر چلنے سے روکا جائے گا۔ یہ اقدام حادثات میں کمی اور سڑکوں کی حفاظت کو بہتر بنانے کے لیے کیا گیا ہے۔
پانچ یا اس سے زیادہ لین والی سڑکوں پر بائیں جانب کی دو لین، اور تین یا چار لین والی سڑکوں پر سب سے بائیں لین پر ڈیلیوری بائیکس پر پابندی ہوگی۔
خلاف ورزی پر 500 سے 700 درہم تک جرمانہ ہوگا، جبکہ تیسری خلاف ورزی پر پرمٹ معطل کیا جا سکتا ہے۔

شارجہ میں بسوں، بائیکس اور بھاری گاڑیوں کے لیے نئی لینز
پہلی نومبر سے شارجہ پولیس بھی نئی لین اسکیم متعارف کرا رہی ہے۔ بھاری گاڑیاں اور بسیں دائیں جانب کی لین استعمال کریں گی، جبکہ موٹر سائیکلوں کے لیے مخصوص لین مقرر کی گئی ہیں۔ خلاف ورزی کرنے والوں پر فیڈرل ٹریفک قانون کے تحت 500 سے 1500 درہم تک جرمانے اور بلیک پوائنٹس عائد ہوں گے۔

ابوظہبی میں نیچرل ہسٹری میوزیم کا افتتاح 22 نومبر کو
22 نومبر کو ابوظہبی میں قدرتی تاریخ کا سب سے بڑا میوزیم کھلے گا، جس میں 11.7 میٹر لمبا "سٹین” نامی مشہور ٹائرانوسورس ریکس فوسل اور 25 میٹر لمبی بلیو وہیل کی نمائش شامل ہوگی۔ یہ میوزیم قدرتی تاریخ کے 13.8 ارب سال پر محیط سفر کو اجاگر کرے گا۔

زاید نیشنل میوزیم کا افتتاح 3 دسمبر کو
ابوظہبی کے سعادیات کلچرل ڈسٹرکٹ میں زاید نیشنل میوزیم کا طویل انتظار ختم ہو جائے گا۔ یہ میوزیم متحدہ عرب امارات کی تاریخ اور بانی شیخ زاید بن سلطان النہیان کی میراث کو خراج عقیدت پیش کرے گا۔ چھ مستقل گیلریز، 300,000 سال قدیم نوادرات اور فالکن کے پروں سے متاثرہ تعمیراتی ڈیزائن اس کی نمایاں خصوصیات ہیں۔

اسکولوں کی سرمائی تعطیلات کا اعلان
نومبر کے اختتام پر اسکولوں کی چھٹیوں کا شیڈول جاری کر دیا گیا ہے۔
ستمبر سے جون تک کے تعلیمی سال والے اسکول: 8 دسمبر 2025 سے 4 جنوری 2026 تک۔
انڈین نصاب کے اسکول: 15 دسمبر 2025 سے 4 جنوری 2026 تک۔

دبئی شاپنگ فیسٹیول 5 دسمبر سے شروع
دبئی شاپنگ فیسٹیول 5 دسمبر سے 11 جنوری 2026 تک جاری رہے گا۔ 800 سے زائد عالمی اور مقامی برانڈز پر رعایتیں، کنسرٹس، آتش بازی، اور ڈرون شوز سمیت کئی تفریحی سرگرمیاں منعقد ہوں گی۔

اہم قومی تعطیلات
• یواے ای فلیگ ڈے – 3 نومبر
• شہداء کی یاد کا دن – 30 نومبر
• یواے ای نیشنل ڈے (عید الاتحاد) – 1 اور 2 دسمبر