خلیج اردو
ریاض: سعودیہ ایئرلائن نے اپنی پہلی تیز رفتار انٹرنیٹ سے مکمل طور پر منسلک پرواز کا کامیاب تجربہ کیا ہے، جو مسافروں کے لیے نئی ڈیجیٹل سہولتوں کی جانب ایک اہم قدم ہے۔ یہ اقدام سعودی عرب کی فضائی صنعت کی جدیدیت اور ڈیجیٹل تبدیلی کے پروگرام کا حصہ ہے۔
سعودی پریس ایجنسی کے مطابق اس آزمائشی پرواز کا مقصد تیز رفتار وائی فائی کنیکٹیویٹی کو جانچنا اور مسافروں سے براہِ راست رائے حاصل کرنا تھا۔ نئی ٹیکنالوجی کے ذریعے دورانِ پرواز بغیر کسی تعطل کے انٹرنیٹ براؤزنگ، لائیو اسٹریمنگ اور ویڈیو کانفرنسنگ ممکن ہو سکے گی۔ فی الحال رفتار 300 میگا بٹ فی سیکنڈ تک پہنچ چکی ہے، جب کہ مستقبل میں اسے 800 میگا بٹ فی سیکنڈ سے بھی زیادہ کیا جائے گا۔
ابتدائی تجرباتی پرواز SV1044 کے دوران، جو 35 ہزار فٹ کی بلندی پر ہوئی، سعودی وزیرِ ٹرانسپورٹ و لاجسٹک سروسز صالح الجاسر اور سعودیہ گروپ کے ڈائریکٹر جنرل انجینئر ابراہیم بن عبدالرحمن العمار نے نئی انٹرنیٹ سروس کے ذریعے براہِ راست سعودی پرو لیگ فٹبال میچ دیکھا۔
وزیر نے دورانِ پرواز ایک لائیو ٹی وی انٹرویو اور سعودی وزیرِ مواصلات و انفارمیشن ٹیکنالوجی عبداللہ السواہا سے ویڈیو کال بھی کی، جو بغیر کسی کنیکٹیویٹی مسئلے کے مکمل ہوئی۔
صالح الجاسر نے اس سروس کو سعودی عرب کے ہوابازی کے شعبے میں ڈیجیٹل انقلاب کا "اسٹریٹیجک انیبلر” قرار دیتے ہوئے کہا کہ جلد ہی یہ سروس سعودیہ کے تمام جہازوں پر معیاری سہولت کے طور پر دستیاب ہوگی۔
انجینئر العمار کے مطابق تقریباً 20 طیاروں میں یہ نظام پہلے ہی نصب کیا جا چکا ہے، جب کہ تمام موجودہ اور آنے والے طیاروں میں اس کی تنصیب جاری ہے۔ انہوں نے کہا کہ یہ منصوبہ سعودیہ ایئرلائن کو ڈیجیٹل ایوی ایشن کے شعبے میں ایک رہنما پوزیشن پر لا رہا ہے۔
