خلیج اردو
متحدہ عرب امارات کی وزارتِ معیشت و سیاحت نے اتوار کے روز خبردار کیا ہے کہ خطے میں جاری کشیدگی کے دوران مارکیٹ کے استحکام یا صارفین کے حقوق کی خلاف ورزی کسی صورت برداشت نہیں کی جائے گی۔
وزیر معیشت و سیاحت اور کمیٹی برائے تحفظ صارفین کے چیئرمین عبد اللہ بن طوق المری نے کہا، "متحدہ عرب امارات میں صارفین کے حقوق کی حفاظت ایک سرخ لکیر ہے”۔
یہ بیان وزیر نے دبئی کے العویر مرکزی سبزی و فروٹ مارکیٹ کے دورے کے دوران دیا، جہاں انہوں نے اس بات کی نگرانی کی کہ موجودہ خطے کے بحران کے باوجود بازار میں غذائی مصنوعات کی کافی مقدار دستیاب ہے اور کسی قسم کی قلت نہیں ہے۔
دورے کے دوران وزیر نے بتایا کہ العویر مارکیٹ میں روزانہ درآمد ہونے والی سبزیوں اور پھلوں کی مقدار معمول کے مطابق ہے اور مارکیٹ میں اشیاء کی مناسب دستیابی سے ملک کے اسٹریٹیجک ذخائر کی تیاری اور سپلائی چین کی مضبوطی ظاہر ہوتی ہے۔ اس سے یہ یقینی بنتا ہے کہ صارفین کی ضروریات بغیر کسی کمی یا قیمتوں پر اثر کے پوری ہو رہی ہیں۔
عبد اللہ بن طوق المری نے مزید کہا کہ وزارتِ معیشت و سیاحت اقتصادی محکموں کے ساتھ مل کر سپلائرز اور ریٹیل اسٹورز میں روزانہ اسٹاک کی سطح کی نگرانی کرتی ہے، اور ہر ضروری غذائی شے کی موجودگی کا مکمل تجزیہ کر کے مسلسل سپلائی اور ممکنہ کمی کو روکا جاتا ہے۔
تجزیہ کاروں کے مطابق وزارت کی یہ کوششیں صارفین کے اعتماد کو برقرار رکھنے اور خطے میں غیر یقینی صورتحال کے دوران بازار میں استحکام قائم رکھنے کے لیے اہم اقدام ہیں۔
