آبنائے ہرمز کی حفاظت کے لیے ٹرمپ کی اپیل پر دنیا خاموش، برطانیہ، فرانس، جاپان اور آسٹریلیا اتحادی مشن میں حصہ نہ لینے پر تیار

خلیج اردو
امریکی صدر ڈونلڈ ٹرمپ کی جانب سے آبنائے ہرمز کی حفاظت کے لیے بین الاقوامی تعاون کی اپیل کے باوجود دنیا نے بڑی حد تک خاموشی اختیار کر لی ہے۔ برطانیہ، فرانس، جاپان اور آسٹریلیا نے واضح کیا ہے کہ وہ اس اتحاد کا حصہ نہیں بنیں گے۔

برطانوی وزیراعظم نے اعلان کیا کہ برطانیہ آبنائے ہرمز کی حفاظت کے لیے اتحاد میں شامل ہونے کے لیے بحری جہاز بھیجنے کے لیے تیار نہیں ہے۔ جاپان نے بھی اپنے بحری جہاز بھیجنے سے انکار کر دیا۔

جرمنی نے بھی آبنائے ہرمز میں یورپی مشن بھیجنے پر تحفظات کا اظہار کیا اور کہا کہ یورپی مشن بحیرہ احمر میں جہازوں کی حفاظت میں مؤثر نہیں رہا، لہٰذا آبنائے ہرمز میں مشن بھیجنے سے کوئی فائدہ نہیں ہوگا۔

فرانسیسی وزیر دفاع نے بھی کہا کہ جب تک کشیدگی جاری ہے فرانس اپنے جہاز نہیں بھیجے گا۔

یہ فیصلے اس بات کی عکاسی کرتے ہیں کہ عالمی طاقتیں اس وقت خطے میں بڑھتی ہوئی کشیدگی میں براہِ راست مداخلت سے گریزاں ہیں، اور امریکا کی توقعات کے برعکس بڑے اتحادی ممالک نے اس معاملے میں محتاط رویہ اختیار کیا ہے۔