خلیج اردو
فجیرہ ماحولیاتی اتھارٹی نے غیر قانونی ماہی گیری کے خلاف کارروائی کرتے ہوئے 21 غیر قانونی لابسٹر جال ضبط کر لیے، جبکہ کارروائی کے دوران کئی نایاب اور خطرے سے دوچار مچھلیوں کو بھی بچا لیا گیا۔
حکام کے مطابق یہ کارروائی دبہ کے سمندری علاقے میں ساحل سے تین بحری میل کے دائرے میں کی گئی، جہاں ماہی گیری کی سرگرمیوں کی نگرانی کے دوران متعدد جال محفوظ سمندری علاقوں کے قریب اور بعض جال محفوظ علاقوں کے اندر نصب پائے گئے۔
ماہرین پر مشتمل ٹیم نے کارروائی کے دوران برآمد ہونے والی مچھلیوں کو فوری طور پر دوبارہ سمندر میں چھوڑ دیا، جبکہ ضبط کیے گئے جال مقررہ ضابطوں کے مطابق دبہ فجیرہ فشرمین ایسوسی ایشن کے حوالے کر دیے گئے۔
فجیرہ ماحولیاتی اتھارٹی کے مطابق سمندری ذخائر کے تحفظ اور غیر قانونی ماہی گیری کی روک تھام کے لیے نگرانی کا عمل چوبیس گھنٹے جاری رکھا جا رہا ہے۔
حکام نے یاد دلایا کہ نومبر 2025 میں بھی برڈ آئی لینڈ ریزرو کے اندر غیر قانونی طور پر ماہی گیری کرنے والی 6 کشتیوں کو ضبط کیا گیا تھا۔
فجیرہ ماحولیاتی اتھارٹی کا کہنا ہے کہ محفوظ سمندری علاقوں میں ماہی گیری ایک سنگین ماحولیاتی خلاف ورزی ہے، جس کے خلاف قانونی کارروائی کی جاتی ہے۔
اتھارٹی کے مطابق مرجان کی چٹانیں، چھوٹی مچھلیاں اور نایاب سمندری حیات ان محفوظ علاقوں پر انحصار کرتی ہیں، جبکہ غیر قانونی ماہی گیری سمندری خوراک کے نظام کو متاثر کرنے کے ساتھ ساتھ مچھلیوں کی افزائش اور مرجان کے قدرتی نظام کو بھی نقصان پہنچاتی ہے۔
حکام نے ماہی گیروں اور شہریوں سے اپیل کی ہے کہ وہ کسی بھی ماحولیاتی خلاف ورزی کی اطلاع 800368 پر دیں۔
فجیرہ ماحولیاتی اتھارٹی نے واضح کیا ہے کہ سمندری وسائل کا تحفظ امارت کی اہم ترجیحات میں شامل ہے اور مستقبل میں بھی ایسے اقدامات جاری رکھے جائیں گے تاکہ آنے والی نسلوں کے لیے قدرتی وسائل کو محفوظ بنایا جا سکے۔
