خلیج اردو
تحدہ عرب امارات کی سائبر سکیورٹی کونسل کے چیئرمین محمد الکویتی نے انکشاف کیا ہے کہ متحدہ عرب امارات میں ایک ہی دن کے دوران 6 لاکھ 40 ہزار سائبر حملے ریکارڈ کیے گئے۔ عرب میڈیا سمٹ میں ’’میڈیا اور ففتھ جنریشن وارز‘‘ کے عنوان سے سیشن سے خطاب کرتے ہوئے انہوں نے کہا کہ سائبر حملوں کا مقصد صرف نظام کو عارضی طور پر متاثر کرنا نہیں بلکہ بجلی، پانی، معیشت اور دیگر اہم شعبوں کے ڈیٹا کو بھی نشانہ بنایا جا سکتا ہے۔
محمد الکویتی نے کہا کہ آگاہی سائبر حملوں کے خلاف دفاع کی پہلی لائن ہے، اس لیے لوگوں کو موصول ہونے والی معلومات پر سوال اٹھانا، اس کا ماخذ جاننا اور شیئر کرنے سے پہلے تصدیق کرنا ضروری ہے۔ ان کے مطابق سائبر جنگ کی نوعیت بھی تبدیل ہو رہی ہے اور اب ایک فرد بھی جعلی معلومات کے ذریعے معاشرے کو متاثر اور واقعات کا رخ تبدیل کر سکتا ہے۔
انہوں نے ایک نجی ادارے پر سائبر حملے کا ذکر کرتے ہوئے بتایا کہ ہیکر نے ایک ایسی سکیورٹی خامی کا فائدہ اٹھایا جسے بروقت درست نہیں کیا گیا تھا اور بعد ازاں 50 لاکھ ڈالر تاوان طلب کیا۔ حکومتی اور نجی اداروں کے تعاون اور بین الاقوامی رابطہ کاری کے ذریعے حملے کا مقابلہ کیا گیا، تاہم ہیکر نے کچھ معلومات ڈارک ویب پر جاری کر دیں۔
سائبر سکیورٹی چیف نے ڈیپ فیک ٹیکنالوجی کے غلط استعمال سے ایک بچے کو پیش آنے والے واقعے کا بھی ذکر کیا، جس میں طلبہ کے ایک گروپ نے بچے کو بلیک میل اور ہراساں کیا، جس کے نتیجے میں اسے ایک سال تک سکول چھوڑنا پڑا۔ انہوں نے کہا کہ ڈیپ فیک کو مذاق کے طور پر استعمال کرنا بھی سنگین نتائج کا باعث بن سکتا ہے۔
محمد الکویتی نے خبردار کیا کہ ففتھ جنریشن جنگ میں اب صرف نظام اور انفراسٹرکچر نہیں بلکہ لوگوں کے خیالات، عادات اور اقدار کو بھی نشانہ بنایا جا رہا ہے۔ انہوں نے میڈیا اور عوام پر زور دیا کہ مصنوعی ذہانت سے تیار یا تبدیل کی گئی تصاویر، معلومات اور خبروں کو نشر یا شیئر کرنے سے پہلے سرکاری اور قابل اعتماد ذرائع سے تصدیق کی جائے۔
