اتحاد ایئرویز اور اتحاد ریل نے مسافروں کے لیے سفری سہولیات کو مربوط بنانے کے معاہدے پر دستخط کر دیے۔ معاہدے کے تحت فضائی اور ریلوے سفر کی مشترکہ بکنگ، شٹل سروسز اور ریلوے سٹیشنز پر مسافروں کے لیے مختلف سہولیات فراہم کرنے پر کام کیا جائے گا، جس سے متحدہ عرب امارات میں سفر کا تجربہ مزید آسان اور مربوط ہوگا۔
دونوں ادارے زاید انٹرنیشنل ایئرپورٹ اور محمد بن زاید سٹی مسافر ریلوے سٹیشن کے درمیان خصوصی شٹل سروس شروع کرنے کے امکانات کا بھی جائزہ لیں گے۔ اس اقدام سے ایئرپورٹ اور قومی ریلوے نیٹ ورک کے درمیان منتقلی مزید آسان بنانے اور مختلف ذرائع آمدورفت کو ایک دوسرے سے جوڑنے میں مدد ملے گی۔
اتحاد ایئرویز کے چیف ریونیو اینڈ کمرشل افسر اریک ڈی نے کہا کہ اتحاد ایئرویز ہر سال لاکھوں سیاحوں کو ابوظبی لانے میں اہم کردار ادا کرتی ہے، جبکہ اتحاد ریل کے ساتھ شراکت داری کا مقصد فضائی سفر کو متحدہ عرب امارات کے مختلف مقامات سے جوڑنا، سیاحت کو فروغ دینا اور مسافروں کے لیے سہولت میں اضافہ کرنا ہے۔
اتحاد ریل کے چیف آپریٹنگ افسر عزا السویدی کے مطابق متحدہ عرب امارات مختلف ذرائع آمدورفت کو مربوط کرکے جدید قومی ٹرانسپورٹ نظام تشکیل دے رہا ہے۔ اتحاد ریل کا 900 کلومیٹر طویل قومی ریلوے نیٹ ورک ساتوں ریاستوں کے 11 شہروں اور علاقوں کو آپس میں جوڑ رہا ہے، جبکہ مسافر ٹرین سروس کا آغاز جون 2026 میں ابوظبی سے فجیرہ روٹ پر کیا گیا تھا۔
