خلیج اردو
متحدہ عرب امارات میں قومی دن عید الاتحاد کے موقع پر بعض ملازمین سالانہ چھٹیوں کو سرکاری تعطیلات کے ساتھ ملا کر مسلسل 9 روزہ طویل وقفہ حاصل کر سکتے ہیں۔ اس سال 2 دسمبر کو ساتوں امارات کے اتحاد کی یاد میں قومی دن منایا جائے گا، جبکہ حکام نے سرکاری اور نجی شعبے کے ملازمین کے لیے مختلف تعطیلات کا اعلان کیا ہے۔
سرکاری شعبے کے ملازمین کو 2، 3 اور 4 دسمبر کو بامعاوضہ تعطیلات دی گئی ہیں۔ یہ چھٹیاں ہفتہ وار تعطیلات 5 اور 6 دسمبر کے ساتھ مل کر پانچ روزہ طویل وقفہ بنائیں گی۔ تاہم سرکاری ملازمین اگر 30 نومبر اور یکم دسمبر کو دو روز کی سالانہ چھٹی لے لیں تو انہیں 28 نومبر سے 6 دسمبر تک مسلسل 9 روز کی چھٹیاں مل سکتی ہیں۔ اس طرح انہیں ایک ہفتے سے زائد وقت آرام، تفریح یا بیرون ملک سفر کے لیے دستیاب ہوگا۔
نجی شعبے کے ملازمین کے لیے قومی دن کے موقع پر 2 اور 3 دسمبر کو دو روزہ بامعاوضہ تعطیلات کا اعلان کیا گیا ہے۔ یہ دونوں چھٹیاں بدھ اور جمعرات کو ہیں، جس کے باعث نجی شعبے کے ملازمین کو سرکاری ملازمین کی طرح طویل ہفتہ وار وقفہ نہیں مل سکے گا۔
تاہم نجی شعبے کے ملازمین 4 دسمبر بروز جمعہ ایک روز کی سالانہ چھٹی لے کر 2 اور 3 دسمبر کی سرکاری تعطیلات کو ہفتہ اور اتوار کی ہفتہ وار چھٹیوں کے ساتھ ملا سکتے ہیں۔ اس طرح انہیں مسلسل پانچ روز کی چھٹیاں مل جائیں گی۔
گزشتہ سال متحدہ عرب امارات نے پہلی مرتبہ عید الاتحاد کی سرکاری تعطیلات کو منتقل کیا تھا، جس کے نتیجے میں رہائشیوں کو چار روزہ طویل وقفہ ملا تھا۔ 2025 میں ابتدا میں 2 اور 3 دسمبر کی تعطیلات مقرر کی گئی تھیں، تاہم بعد میں انہیں تبدیل کرکے یکم اور 2 دسمبر کر دیا گیا تھا۔ اس طرح ہفتہ اور اتوار کو ہفتہ وار چھٹی کرنے والے ملازمین کو 29 نومبر سے 2 دسمبر تک مسلسل چار روز آرام کا موقع ملا تھا۔
