خلیج اردو
دبئی پولیس نے گولڈ سوق کے علاقے میں ٹریفک قوانین کی خلاف ورزی اور غیر محفوظ انداز میں سواری کرنے والوں کے خلاف کارروائی کرتے ہوئے 408 الیکٹرک اسکوٹرز، ای بائیکس اور سائیکلیں ضبط کرلیں۔
دبئی پولیس کے مطابق نیف پولیس اسٹیشن نے جنرل ڈیپارٹمنٹ آف ٹریفک کے تعاون سے روڈ سیفٹی مہم چلائی، جس کے دوران ٹریفک قوانین کی خلاف ورزی کرنے پر 300 الیکٹرک اسکوٹرز، 50 الیکٹرک سائیکلیں اور 58 سائیکلیں تحویل میں لی گئیں۔
پولیس نے خلاف ورزی کرنے والوں کے خلاف قانونی کارروائی بھی کی، جس کا مقصد ٹریفک قوانین پر عملدرآمد بہتر بنانا اور حادثات و زخمی ہونے کے خطرات کو کم کرنا ہے۔
نیف پولیس اسٹیشن کے ڈائریکٹر بریگیڈیئر عمر موسیٰ عاشور نے کہا کہ دبئی پولیس ٹریفک آگاہی کو خصوصی اہمیت دے رہی ہے اور حادثات میں کمی اور سڑکوں کو محفوظ بنانے کے لیے مختلف اقدامات جاری ہیں۔
مہم کے دوران اسکوٹر اور سائیکل استعمال کرنے والوں کو ٹریفک قوانین، مقررہ راستوں اور مخصوص مقامات کے استعمال اور حفاظتی سامان پہننے کی اہمیت سے آگاہ کیا گیا۔ آگاہی سرگرمیوں سے مجموعی طور پر 932 افراد نے استفادہ کیا جبکہ علاقے میں کام کرنے والے بعض افراد میں حفاظتی سامان اور ضروری اشیا بھی تقسیم کی گئیں۔
بریگیڈیئر عمر موسیٰ عاشور نے اسکوٹر اور سائیکل سواروں پر زور دیا کہ وہ صرف مقررہ راستوں پر سفر کریں، ذاتی حفاظتی سامان استعمال کریں اور ٹریفک قوانین و حفاظتی تقاضوں کی پابندی کریں۔
انہوں نے خبردار کیا کہ اسکوٹر اور سائیکلوں کے لیے مختص نہ کیے گئے مقامات پر سواری کرنے سے ڈرائیوروں کے لیے صورتحال غیر واضح ہوسکتی ہے، جس سے حادثات کا خطرہ بڑھ جاتا ہے۔ ان کا کہنا تھا کہ سڑک استعمال کرنے والے تمام افراد میں محفوظ رویوں کو فروغ دینے کے لیے کمیونٹی اور میڈیا کے ذریعے مسلسل آگاہی مہمات جاری رکھنا ضروری ہے۔
