خلیج اردو
دبئی: پولیس نے فون فراڈ میں ملوث تین مجرمانہ گروہوں کو گرفتار کر لیا ہے، جن کے 13 ایشیائی ارکان شہریوں اور رہائشیوں کو بینک افسران اور حکام بن کر دھوکہ دے رہے تھے۔ جمعرات کو جاری کردہ بیان کے مطابق یہ کارروائی بینکاری فراڈ کے خلاف دبئی پولیس کی بڑی کامیابی ہے۔
پولیس کے مطابق، "یہ افراد پولیس، بینک یا دیگر سرکاری اداروں کے نمائندے بن کر شہریوں اور رہائشیوں سے رابطہ کرتے، اور انہیں یہ باور کراتے کہ ان کے بینکنگ ڈیٹا کو اپڈیٹ کرنا ہے، ٹریفک جرمانے ادا کرنے ہیں، یا اقامہ سے متعلق مسائل حل کرنے ہیں۔ اسی بہانے سے وہ ان کا ذاتی اور بینکنگ ڈیٹا حاصل کرتے۔”
مزید بتایا گیا کہ گروہوں نے لوگوں کے اعتماد کو استعمال کرتے ہوئے بینک کارڈز کی تفصیلات، سی وی وی کوڈ اور ون ٹائم پاس ورڈ (OTP) حاصل کرنے کے لیے جدید حربے استعمال کیے۔ گرفتار شدگان اور ان کے زیر استعمال آلات کی دھندلی تصاویر بھی جاری کی گئیں۔
پولیس نے کہا کہ ان گرفتار گروہوں کے خلاف کارروائی سائبر فراڈ کے خلاف جاری مہم کا حصہ ہے، جس کا مقصد کمیونٹی کو محفوظ رکھنا اور عوامی آگاہی بڑھانا ہے۔
دبئی پولیس نے عوام کو یاد دلایا کہ کوئی بھی بینک صارفین سے فون، ای میل یا ایس ایم ایس کے ذریعے ذاتی یا بینکنگ معلومات طلب نہیں کرتا۔ اگر کسی کو اس قسم کی مشکوک کال یا پیغام موصول ہو تو فوری طور پر قریبی پولیس اسٹیشن، دبئی پولیس ایپ یا ویب سائٹ www.ecrime.ae کے ذریعے رپورٹ کیا جائے۔
