بھارتی کمپنی ٹائیٹن کا دبئی کی دماس جیولری میں اکثریتی حصص خریدنے کا اعلان

خلیج اردو
دبئی: بھارت کی معروف فیشن اور جیولری ساز کمپنی ٹائیٹن (Titan Company) نے اعلان کیا ہے کہ وہ متحدہ عرب امارات کی دماس جیولری (Damas LLC) میں اکثریتی حصص خریدے گی۔ یہ معاہدہ قطری کمپنی مناعی کارپوریشن (Mannai Corporation) سے 1.038 ارب درہم کے انٹرپرائز ویلیو پر طے پایا ہے۔

اس معاہدے کے تحت ٹائیٹن کمپنی دماس میں 67 فیصد حصص اور ووٹنگ رائٹس حاصل کرے گی۔ بقیہ 33 فیصد حصص دسمبر 2029 کے بعد حاصل کرنے کا اختیار بھی ٹائیٹن کے پاس ہوگا۔

ٹائیٹن کی یہ سرمایہ کاری 2026 تک مکمل ہونے کی امید ہے۔ اس معاہدے کا مقصد ٹائیٹن کی جی سی سی ممالک میں کاروباری توسیع ہے۔

دبئی میں 1907 میں قائم ہونے والی دماس جیولری اس وقت چھ خلیجی ممالک میں 146 اسٹورز کی مضبوط موجودگی رکھتی ہے۔

ٹائیٹن کے منیجنگ ڈائریکٹر سی کے وینکٹارمن نے کہا:
"تانیشق برانڈ کے بعد ہم عالمی سطح پر جیولری کے شعبے میں مزید پیش رفت کے لیے تیار ہیں۔ دماس کے حصول سے ہم صرف بھارتی تارکین وطن ہی نہیں بلکہ دیگر قوموں اور برادریوں کو بھی ہدف بنا رہے ہیں۔”

انہوں نے مزید کہا کہ یہ معاہدہ نہ صرف ٹائیٹن کے لیے ایک عالمی موقع فراہم کرے گا بلکہ جی سی سی مارکیٹ میں ہماری موجودگی کو بھی مستحکم کرے گا، بالخصوص ٹیلنٹ، ریٹیل نیٹ ورکس اور سپلائی چین میں ہم آہنگی کے ذریعے۔

مناعی کارپوریشن کے گروپ سی ای او الیکھ گریوال نے کہا کہ دماس 2012 سے ان کی کمپنی کی ذیلی ادارہ تھی اور اب وقت ہے کہ اس کے اگلے مرحلے کی توسیع کے لیے سرمایہ کاری کی جائے۔

انہوں نے کہا کہ دماس اور ٹائیٹن کا اشتراک خلیجی خطے میں دماس کی ترقی کے اگلے باب کو تقویت دے گا، جبکہ مناعی اگلے چار سال تک دماس میں اقلیتی حصہ دار رہے گی۔

دماس نے 2024 میں 1.461 ارب درہم کا کاروبار ریکارڈ کیا۔ یہ معاہدہ مخصوص شرائط اور ریگولیٹری منظوریوں سے مشروط ہے۔