یو اے ای میں 22 قیراط سونے کی قیمت 370 درہم فی گرام سے تجاوز، زیورات کی خریداری میں نمایاں کمی

خلیج اردو
دبئی: متحدہ عرب امارات میں سونے کے زیورات کی مانگ میں نمایاں کمی دیکھنے میں آ رہی ہے، خصوصاً جب 22 قیراط سونے کی قیمت 370 درہم فی گرام کی نفسیاتی حد عبور کرتی ہے۔ زیورات خریدنے والے صارفین اب قیمتوں کے حوالے سے زیادہ حساس ہو چکے ہیں۔

ٹائٹن کمپنی (تنیشق) کے سربراہ بین الاقوامی زیورات کاروبار آدتیہ سنگھ نے کہا کہ "یو اے ای جیولری مارکیٹ اپنی مضبوطی کے باوجود قیمتوں میں بڑے اتار چڑھاؤ کے سامنے زیادہ محتاط ہو گئی ہے۔ جیسے ہی 22 قیراط سونے کی قیمت 370 درہم فی گرام کے قریب پہنچتی ہے، صارفین خریداری میں ہچکچاہٹ کا مظاہرہ کرتے ہیں۔”

ملک بھر کے جیولرز نے اس رجحان کی تصدیق کی ہے۔ فی الحال وہی خریدار سونے کی خریداری کر رہے ہیں جو قیمتوں میں مزید اضافے کی توقع رکھتے ہیں یا شادی جیسی اہم تقریبات کے لیے زیورات خرید رہے ہیں۔ "عام شوقیہ خریداری تقریباً ختم ہو چکی ہے”، ایک سونے کے تاجر نے کہا۔

اس سال عالمی منڈی میں سونے کی قیمتیں ریکارڈ سطح پر پہنچ چکی ہیں، جہاں فی اونس قیمت 3,500 ڈالر جبکہ دبئی میں 24 قیراط سونا 420 درہم فی گرام کی سطح پر پہنچ چکا ہے۔ اتوار کے روز عالمی مارکیٹ میں اسپاٹ گولڈ 3,363 ڈالر فی اونس پر بند ہوا، جو 1.97 فیصد اضافہ ہے۔

یو اے ای میں اتوار کو 24 قیراط سونا 405.25 درہم، 22 قیراط 375.25 درہم، 21 قیراط 360.00 درہم اور 18 قیراط 308.50 درہم فی گرام پر فروخت ہو رہا تھا۔

سونے کی قیمتوں میں اس اضافے کی بڑی وجہ عالمی سیاسی کشیدگی، سینٹرل بینکوں کی مضبوط طلب، اور حالیہ تجارتی محصولات کی جنگ قرار دی جا رہی ہے۔ خلیج ٹائمز کی سابقہ رپورٹ کے مطابق 400 درہم فی گرام اب 24 قیراط سونے کی نئی ‘نارمل’ قیمت بن چکی ہے۔

گزشتہ سال کے دوران سونے کی قیمت میں 100 درہم فی گرام کا اضافہ ہو چکا ہے۔

آدتیہ سنگھ نے کہا کہ "قیمتوں میں اضافے کے باوجود خریدار مکمل طور پر پیچھے نہیں ہٹے، البتہ ان کی خریداری کا انداز ضرور تبدیل ہو گیا ہے۔ صارفین اب پروموشنز، کم میکنگ چارجز، یا ڈائمنڈ و نیم قیمتی پتھروں والے زیورات میں رعایتوں کو ترجیح دے رہے ہیں۔”

ورلڈ گولڈ کونسل کی دوسری سہ ماہی 2025 کی رپورٹ کے مطابق یو اے ای کے صارفین زیورات کے بجائے گولڈ کوائنز اور بارز میں سرمایہ کاری کو ترجیح دے رہے ہیں۔