خلیج اردو
بیروت: حزب اللہ کے ڈپٹی سیکرٹری جنرل شیخ نعیم قاسم نے اسرائیل کو دو ٹوک وارننگ دیتے ہوئے کہا ہے کہ اگر جنگ دوبارہ چھڑی تو حزب اللہ کے راکٹ اسرائیل کے اندر گرجیں گے۔ انہوں نے کہا کہ لبنان کو اپنی دفاعی صلاحیتوں کو مضبوط بنانے اور ایسے ہتھیار رکھنے کی ضرورت ہے جو اسرائیل کو حقیقی نقصان پہنچا سکیں۔
نعیم قاسم نے کہا کہ ہمیں لبنانی فوج کو مستحکم کرنا ہو گا تاکہ ہم اپنی سرزمین اور عوام کے دفاع کے لیے ہر ممکن اقدامات کر سکیں۔ ان کا کہنا تھا کہ اسرائیل کی جارحانہ پالیسیوں کا مقابلہ کرنے کے لیے لبنان کو اپنی دفاعی حکمت عملی کو ازسرنو ترتیب دینا ہوگا، اور حزب اللہ اپنی مزاحمتی قوت کو مزید مضبوط بنائے گا۔
انہوں نے مزید کہا کہ حزب اللہ کسی صورت اسرائیل کے خطرات کو نظرانداز نہیں کرے گا، اور اگر جنگ مسلط کی گئی تو اس کا جواب بھرپور راکٹ حملوں سے دیا جائے گا۔ نعیم قاسم نے اس بات پر زور دیا کہ لبنان کو اپنی خودمختاری اور دفاع کے لیے ایسے ہتھیاروں کی ضرورت ہے جو اسرائیل کو واضح پیغام دے سکیں کہ لبنان کا دفاع ناقابل تسخیر ہے۔
