خلیج اردو
ابوظہبی: امارات کی اسپیس ٹیک کمپنی اسپیس42 (ADX: SPACE42) نے اعلان کیا ہے کہ اس کے اسپیس سروسز یونٹ کے سی ای او علی الہاشمی کو گلوبل سیٹلائٹ آپریٹرز ایسوسی ایشن (GSOA) کا بورڈ چیئرمین منتخب کیا گیا ہے۔ وہ یہ منصب سنبھالنے والے پہلے اماراتی ہیں، جو عالمی اسپیس انڈسٹری میں یو اے ای کے بڑھتے ہوئے کردار کا ایک اور سنگ میل ہے۔
علی الہاشمی ٹیلی کمیونی کیشنز، ڈیفنس اور ایرو اسپیس میں دو دہائیوں سے زیادہ تجربہ رکھتے ہیں۔ وہ 2023 سے جی ایس او اے کے وائس چیئر رہ چکے ہیں اور اسپیس42 کے تحت کئی اہم منصوبوں کی قیادت کی، جن میں اس سال تھریا-4 سیٹلائٹ کا لانچ اور افریقہ میں ڈائریکٹ ٹو ڈیوائس سروسز کا آغاز شامل ہے۔ وہ اے ایم ایم آر او سی (AMMROC) کے چیئرمین اور یو اے ای اسپیس ایجنسی و نیشنل اسپیس سائنس اینڈ ٹیکنالوجی سینٹر کے بورڈز کے رکن بھی ہیں۔
اسپیس42 کے قیام سے قبل وہ یاح ست کے گروپ سی ای او رہے، جہاں انہوں نے 2021 میں کمپنی کو ابوظہبی سیکیورٹیز ایکسچینج میں لسٹ کرایا، جو ایکسچینج کی تاریخ کا دوسرا سب سے بڑا آئی پی او تھا، اور 2018 میں تھریا کے انضمام کی قیادت کی۔
بین الاقوامی سطح پر بھی انہیں تسلیم کیا گیا ہے، فوربز مڈل ایسٹ نے انہیں 2023 اور 2024 میں ٹاپ 100 سی ای اوز کی فہرست میں شامل کیا، جبکہ 2023 میں انہیں سسٹین ایبلٹی لیڈرز میں بھی نامزد کیا گیا۔
اپنی کامیابی پر اظہار خیال کرتے ہوئے علی الہاشمی نے کہا کہ "یہ میرے لیے ذاتی اور پیشہ ورانہ طور پر نہایت اہم ہے۔ میں اپنے ساتھیوں کا شکر گزار ہوں جنہوں نے مجھ پر اعتماد کیا۔ اب میری کوشش ہوگی کہ صنعت میں جدت اور تعاون کو مزید آگے بڑھایا جائے۔”
نئے قیادت کے ساتھ نائب چیئرز میں یورپ سے ایس ای ایس کے سی ای او عادل الصالح اور افریقہ سے نائگ کام سیٹ کی سی ای او جین نکیشی ایگرٹن-ایڈہن بھی شامل ہیں۔
جی ایس او اے دنیا کی واحد غیر منافع بخش عالمی تنظیم ہے جو پورے سیٹلائٹ ایکو سسٹم کی نمائندگی کرتی ہے اور ریگولیٹرز و عالمی اداروں جیسے آئی ٹی یو اور ورلڈ اکنامک فورم کی سطح پر سیٹلائٹ سیکٹر کی مرکزی آواز ہے۔
یو اے ای کی یہ پیش رفت اسپیس اور سیٹلائٹ کمیونیکیشنز میں اس کے بڑھتے ہوئے کردار کو مزید مستحکم کرتی ہے، جس میں اسپیس42 کے ذریعے جدید سیٹلائٹ خدمات، تحقیق و ترقی، اور مقامی صلاحیتوں کو فروغ دینے کے پروگرام شامل ہیں۔
