یو اے ای میں موسم کی صورتحال پر نظر، حکام کی مکمل تیاری کا اعلان

خلیج اردو

ابوظہبی: نیشنل ایمرجنسی کرائسس اینڈ ڈیزاسٹر مینجمنٹ اتھارٹی نے کہا ہے کہ وہ ملک میں جمعے سے آئندہ ہفتے کے وسط تک متوقع غیر مستحکم موسم کی صورتحال پر قریبی نظر رکھے ہوئے ہے۔

اتھارٹی نے اس بات کی تصدیق کی ہے کہ وہ ممکنہ موسمی تغیرات سے نمٹنے کے لیے مکمل طور پر تیار ہے۔ اس سلسلے میں وفاقی اور مقامی اداروں کے درمیان ہم آہنگی برقرار رکھی جا رہی ہے جبکہ موسم کی تبدیلیوں کی مسلسل نگرانی بھی جاری ہے۔

نیشنل سینٹر آف میٹرولوجی (این سی ایم) کے مطابق، جمعے 10 اکتوبر سے منگل 14 اکتوبر تک یو اے ای کے مختلف علاقوں میں جنوب سے سطحی کم دباؤ کا سلسلہ اور بالائی سطح پر نسبتاً ٹھنڈی اور مرطوب ہوا کا دباؤ اثر انداز ہوگا، جس کے باعث ملک میں غیر مستحکم موسم، مختلف شدت کی بارش، تیز ہوائیں اور بعض علاقوں میں گرج چمک کے امکانات ہیں۔

ماہرین کے مطابق بالائی سطح کے کم دباؤ والے نظام بادلوں کی افزائش اور بارش کے امکانات بڑھاتے ہیں۔ اس کے نتیجے میں سمندر میں تیز لہریں، سطحی حدِ نگاہ میں کمی اور ہلکی اشیاء کے اڑنے کے واقعات پیش آ سکتے ہیں۔