
خلیج اردو
متحدہ عرب امارات میں کرکٹ کے شوقین افراد کے لیے ایک نئے ٹورنامنٹ کا اعلان کردیا گیا ہے، جس میں فاتح ٹیم ایک لاکھ درہم کا بڑا انعام حاصل کرسکے گی۔ معروف ادارے بگ ٹکٹ نے ایمریٹس کرکٹ بورڈ کے تعاون سے پہلی مرتبہ بگ کمیونٹی ٹورنامنٹ شروع کرنے کا اعلان کیا ہے۔ اس مقابلے میں یو اے ای بھر سے کرکٹ ٹیمیں حصہ لے سکیں گی، جبکہ رجسٹریشن اور ٹورنامنٹ میں شرکت کے لیے کوئی فیس مقرر نہیں کی گئی۔
یہ ٹورنامنٹ 8 اوورز پر مشتمل ہوگا اور اس میں ٹینس بال کرکٹ کھیلی جائے گی۔ یو اے ای میں مقیم 18 سال یا اس سے زائد عمر کے افراد اس مقابلے میں شرکت کے اہل ہوں گے۔ ہر ٹیم میں کپتان سمیت 16 کھلاڑی شامل ہونا ضروری ہیں۔ ٹیموں کو بگ ٹکٹ کی سرکاری ویب سائٹ پر دستیاب رجسٹریشن فارم مکمل کرکے اپنی ٹیم کا اندراج کرانا ہوگا۔ منتظمین نے واضح کیا ہے کہ شرکت کے لیے بگ ٹکٹ کا کوئی ریفل ٹکٹ خریدنا ضروری نہیں ہے۔
بگ ٹکٹ کے مطابق ٹورنامنٹ کے لیے رجسٹریشن 3 نومبر سے شروع ہوچکی ہے اور 30 نومبر 2026 تک جاری رہے گی۔ رجسٹریشن مکمل ہونے کے بعد یکم دسمبر کو الیکٹرانک قرعہ اندازی کی جائے گی، جس کے ذریعے زیادہ سے زیادہ 32 ٹیموں کا انتخاب ہوگا۔ چار علاقوں ابوظبی، دبئی، شارجہ اور شمالی امارات سے آٹھ، آٹھ ٹیمیں منتخب کی جائیں گی۔ کامیاب ٹیموں کے نام 3 دسمبر کو بگ ٹکٹ کے لائیو ڈرا شو میں ظاہر کیے جائیں گے۔
ٹورنامنٹ کے پہلے مرحلے میں ہر علاقے کی منتخب ٹیمیں علاقائی مقابلوں میں حصہ لیں گی اور ہر علاقے سے ایک فاتح ٹیم سامنے آئے گی۔ چاروں علاقائی فاتح ٹیمیں سیمی فائنل میں پہنچیں گی، جہاں دو مقابلوں کے ذریعے فائنل کھیلنے والی ٹیموں کا فیصلہ ہوگا۔ بعد ازاں فائنل میں کامیاب ہونے والی ٹیم مجموعی ٹورنامنٹ چیمپئن بنے گی۔
ایمریٹس کرکٹ بورڈ مقابلوں کی نگرانی کرے گا اور کھیل کے قواعد و ضوابط طے کرے گا۔ ٹورنامنٹ میں شرکت کرنے والی ہر ٹیم کو میچز کے لیے آفیشل جرسی بھی فراہم کی جائے گی۔
ٹورنامنٹ کا شیڈول بھی جاری کردیا گیا ہے، جس کے مطابق 13 دسمبر 2026 کو شارجہ، 20 دسمبر کو ابوظبی، 27 دسمبر کو دبئی اور 3 جنوری 2027 کو شمالی امارات کے علاقائی مقابلے ہوں گے۔ اسی روز فائنل میں پہنچنے والی ٹیموں کا اعلان لائیو شو کے دوران کیا جائے گا، جبکہ ٹورنامنٹ کا فائنل 17 جنوری 2027 کو دبئی میں کھیلا جائے گا۔
انعامات کی تفصیلات کے مطابق ٹورنامنٹ کی چیمپئن ٹیم کو ایک لاکھ درہم اور رنر اپ ٹیم کو 25 ہزار درہم دیے جائیں گے۔ چاروں علاقائی فاتح ٹیموں کے لیے بھی فی ٹیم 10 ہزار درہم کا انعام مقرر کیا گیا ہے۔ چونکہ یہ انعامات ایک دوسرے کے علاوہ ہیں، اس لیے مجموعی چیمپئن ٹیم ایک لاکھ 10 ہزار درہم تک حاصل کرسکتی ہے۔
بگ کمیونٹی ٹورنامنٹ کا مقصد صرف کرکٹ مقابلوں کا انعقاد نہیں بلکہ کمیونٹی سطح پر کھیلوں کے فروغ، ٹیم ورک اور کھلاڑیوں کے باہمی تعلقات کو مضبوط بنانا بھی ہے۔ منتظمین کے مطابق اس اقدام کے ذریعے ان کھلاڑیوں کی محنت اور جذبے کو بھی سراہا جائے گا جو روزانہ پریکٹس کرتے اور کمیونٹی کرکٹ کو زندہ رکھتے ہیں۔
وہ ٹیمیں جو رجسٹریشن کرانے کے باوجود الیکٹرانک قرعہ اندازی میں منتخب نہیں ہوں گی، انہیں بھی کمیونٹی کرکٹ کٹس جیتنے کے موقع کے لیے قرعہ اندازی میں شامل کیا جائے گا۔







