بھارتی صحافیوں کا لاہور میں تاریخی استقبال، پاکستانی عوام کی محبت دیکھ کر حیران رہ گئے،وکرانت گپتا اور نکھل ناز کا ناقابلِ یقین تجربہ – پاکستانیوں کی مہمان نوازی نے دل جیت لیے

خلیج اردو
دبئی:بھارت کی جانب سے آئی سی سی چیمپئنز ٹرافی کے لیے اپنی کرکٹ ٹیم پاکستان نہ بھیجنے کے فیصلے کے باوجود، کچھ سینئر بھارتی اسپورٹس صحافی حال ہی میں لاہور کا دورہ کرکے خوبصورت یادیں سمیٹ کر واپس لوٹے ہیں۔

معروف بھارتی اسپورٹس صحافی نکھل ناز اور وکرانت گپتا، جو دبئی میں بھارت کے میچز کی کوریج کے لیے موجود تھے، نے آئی سی سی کی جانب سے بھارت کے تمام میچز دبئی میں کرانے کے اعلان کے باوجود پاکستان کا ویزا حاصل کرنے کا فیصلہ کیا۔

وکرانت گپتا، جو 2004 اور 2006 میں بھارتی ٹیم کے ہمراہ پاکستان آ چکے ہیں، شمالی بھارت میں ایک مشہور نام ہیں اور ان کے کرکٹ شوز پاکستان میں بھی بے حد مقبول ہیں۔ نکھل ناز کے لیے یہ سفر صرف کرکٹ سے جُڑا نہیں تھا بلکہ وہ اپنے آبائی علاقے کی جستجو میں بھی پاکستان آئے تھے، جہاں سے ان کے دادا دادی 1947 میں ہجرت کر کے بھارت چلے گئے تھے۔

دونوں صحافی دبئی میں بھارت کے ابتدائی دو میچز کور کرنے کے بعد لاہور روانہ ہوئے، جہاں ان کا والہانہ استقبال کیا گیا۔ پاکستانی شائقین اور عوام نے ان پر محبت نچھاور کی، جس سے وہ بے حد متاثر ہوئے۔

پاکستانی صحافی ثناء اللہ، جو پہلے بھی ان دونوں بھارتی صحافیوں سے بیرون ملک ملاقات کر چکے تھے، جانتے تھے کہ پاکستان میں انہیں کتنی پذیرائی ملے گی۔ ان کے مطابق، جب وہ انہیں لاہور کی ایک تاریخی جگہ لے کر گئے تو تقریباً 1500 افراد انہیں دیکھنے اور ملنے کے لیے وہاں موجود تھے۔

وکرانت گپتا، جو پہلے بھی پاکستان کی مہمان نوازی کا تجربہ کر چکے تھے، کا کہنا تھا کہ یہ دورہ ان کے لیے سب سے یادگار رہا۔ انہوں نے کہا کہ پاکستانی عوام میں بھارتی کرکٹ اور کھلاڑیوں کے لیے بے پناہ محبت ہے اور چونکہ بھارتی ٹیم پاکستان نہیں آئی، تو یہ محبت صحافیوں پر نچھاور کی گئی۔

لاہور میں قیام کے دوران، گپتا اور ناز کو پاکستانی ٹی وی شوز میں بھی مدعو کیا گیا۔ ایک شو میں نکھل ناز نے اپنی خاندانی تاریخ کا ذکر کیا، جس پر کچھ پاکستانی ناظرین نے فوراً ان سے رابطہ کیا اور ان کے آبائی علاقے بھیرہ کے حوالے سے معلومات فراہم کیں۔ کچھ لوگوں نے انہیں تصاویر بھی بھیجیں اور یہاں تک کہ انہیں اور ان کی والدہ کو مدعو کیا کہ وہ آئیں اور اپنے آبائی علاقے کو دیکھیں۔

نکھل ناز کا کہنا تھا کہ وہ پہلے ہی پنجابی مہمان نوازی سے واقف تھے، مگر جو محبت اور اپنائیت پاکستان میں ملی، وہ ان کے لیے ایک ناقابلِ فراموش تجربہ ہے۔ انہوں نے کہا کہ وہ اب دوبارہ پاکستان آنا چاہتے ہیں، خاص طور پر اپنی والدہ کے ساتھ، تاکہ وہ اپنے آبائی علاقے اور مذہبی مقامات کا دورہ کر سکیں۔