خلیج اردو
دبئی: دبئی کا سب سے بڑا کمیونٹی سائیکلنگ ایونٹ، دبئی رائیڈ 2025، اتوار 2 نومبر کو شیخ زاید روڈ پر منعقد ہوگا۔ یہ ایونٹ دبئی فٹنس چیلنج کا حصہ ہے اور اس میں ہر عمر کے افراد کو شہر کے مشہور مقامات کے درمیان سائیکلنگ کا موقع فراہم کیا جائے گا۔
دبئی روڈز اینڈ ٹرانسپورٹ اتھارٹی (RTA) نے شرکاء کی سہولت کے لیے میٹرو سروس کے اوقات بڑھا دیے ہیں۔ دبئی میٹرو اتوار کے روز صبح 3 بجے سے رات 12 بجے تک مسلسل چلتی رہے گی تاکہ شرکاء کو ایونٹ تک آسانی سے رسائی حاصل ہو سکے۔
شرکاء کی حفاظت اور ٹریفک کی روانی برقرار رکھنے کے لیے بعض اہم شاہراہیں صبح 3 بجے سے 10 بجے تک بند رہیں گی، جن میں شامل ہیں:
شیخ زاید روڈ (ٹریڈ سینٹر راؤنڈ اباؤٹ سے الہدیقہ برج تک)،
لوئر فنانشل سینٹر اسٹریٹ (شیخ زاید روڈ سے ال خیل روڈ تک)،
اور شیخ محمد بن راشد بولیوارڈ کا ایک طرفہ حصہ۔
RTA نے شہریوں کو متبادل راستے اختیار کرنے کی ہدایت دی ہے جن میں اپر فنانشل سینٹر اسٹریٹ، زعبیل پیلس روڈ، الوصل روڈ، ال خیل روڈ، اور العسیل روڈ شامل ہیں۔
سالک کمپنی نے بھی ایونٹ کے دوران عارضی فیس کا اعلان کیا ہے۔ صبح 6 بجے سے 10 بجے تک سالک فیس 6 درہم ہوگی (عام 4 درہم کے بجائے)، جبکہ صبح 10 بجے سے اگلے دن رات 1 بجے تک 4 درہم وصول کیے جائیں گے۔ پیر کی صبح 1 بجے سے 6 بجے تک کوئی فیس نہیں ہوگی۔
شرکاء کے لیے کیریم بائیک کی جانب سے مفت سنگل ٹرپ پاسز بھی فراہم کیے جا رہے ہیں۔ یہ سہولت صبح 3 بجے سے 8 بجے تک "DR25” پرومو کوڈ استعمال کر کے حاصل کی جا سکتی ہے۔ بائیکس میوزیم آف دی فیوچر (انٹری اے) اور لوئر فنانشل سینٹر اسٹریٹ (انٹری ای) سمیت 200 سے زائد اسٹیشنز پر دستیاب ہوں گی۔
گزشتہ سال 37 ہزار سے زائد سائیکل سواروں نے ایونٹ میں شرکت کی تھی، جب کہ منتظمین کو توقع ہے کہ اس سال شرکاء کی تعداد مزید بڑھے گی۔
ایونٹ میں دو روٹس ہوں گے:
4 کلومیٹر فیملی روٹ جو دبئی مال، دبئی اوپیرا اور برج خلیفہ کے گرد ہوگا،
جبکہ 12 کلومیٹر شیخ زاید روڈ روٹ ٹریڈ سینٹر سے صفا پارک تک محیط ہوگا۔
ایونٹ کے اوقات درج ذیل ہیں:
گیٹس صبح 6:15 پر کھلیں گے، 7:30 پر بند ہوں گے،
جبکہ روڈز 8:15 پر دوبارہ کھول دیے جائیں گے۔
تجربہ کار سائیکل سواروں کے لیے "اسپیڈ لیپس” کا خصوصی مرحلہ صبح 5 سے 6 بجے تک ہوگا، جس میں کم از کم رفتار 30 کلومیٹر فی گھنٹہ مقرر کی گئی ہے۔
