: دبئی میں منشیات کے استعمال پر خاتون کو پانچ ہزار درہم جرمانہ

خلیج اردو

دبئی: دبئی کی فوجداری عدالت نے 22 سالہ ایشیائی خاتون کو نشہ آور یا نفسیاتی اثر رکھنے والے مادے کے استعمال کے جرم میں سزا سناتے ہوئے پانچ ہزار درہم جرمانہ عائد کر دیا۔

عدالتی ریکارڈ کے مطابق مقدمہ اس وقت سامنے آیا جب دبئی پولیس کے جنرل ڈیپارٹمنٹ آف انسدادِ منشیات کو معلومات موصول ہوئیں کہ مذکورہ خاتون منشیات کے استعمال اور قبضے میں ملوث ہے۔ معلومات کی تصدیق کے لیے ضروری تحقیقات اور نگرانی کی گئی جن سے فراہم کردہ اطلاعات کی درستگی ثابت ہوگئی، جس کے بعد خاتون کے خلاف قانونی کارروائی عمل میں لائی گئی۔

استغاثہ کے سامنے اور بعد ازاں عدالت میں پوچھ گچھ کے دوران ملزمہ نے اپنے خلاف عائد الزامات کا اعتراف کیا، جس کی بنیاد پر عدالت نے اسے قصوروار قرار دے کر جرمانہ عائد کر دیا۔ عدالت نے اپنے فیصلے میں واضح کیا کہ منشیات کا استعمال نہ صرف قانون کی خلاف ورزی ہے بلکہ معاشرے اور فرد کی صحت کے لیے بھی سنگین خطرات رکھتا ہے۔