خلیج اردو
دبئی: سعودی حکام نے ریاض کے گنجان آباد علاقے منفوحة میں بڑے پیمانے پر کارروائی کرتے ہوئے 124 کاروباری ادارے بند کر دیے، ہزاروں غیر محفوظ مصنوعات ضبط کر لیں اور کئی فوڈ آؤٹ لیٹس کو صارفین کی شکایات پر سیل کر دیا۔ یہ بات روزنامہ "عکاظ” نے اپنی رپورٹ میں بتائی۔
میونسپل حکام، سیکیورٹی فورسز اور دیگر سرکاری اداروں کی مشترکہ اس مہم کے دوران اب تک 812 خلاف ورزیاں درج کی گئیں، 11 مقامات پر بجلی کاٹ دی گئی، 52 گلی محلوں کے ٹھیلے ضبط کیے گئے اور تقریباً 32 ہزار ناقص مصنوعات تلف کر دی گئیں۔ اس کے علاوہ 143 کلوگرام تمباکو اور تقریباً 6 ٹن خراب کھانے کی اشیاء بھی ضائع کر دی گئیں۔
چھاپوں کے دوران بوسیدہ گوشت، غیر معلوم ذرائع سے لایا گیا جعلی تمباکو، زائد المیعاد کاسمیٹکس، غیر صحت مند طریقے سے رکھا گیا کھانا اور رہائشی گھروں کو غیر قانونی گوداموں کے طور پر استعمال کرنے جیسے سنگین مسائل سامنے آئے۔
میونسپلٹی کے مطابق یہ خلاف ورزیاں براہ راست عوامی صحت کے لیے خطرہ ہیں، اور ان پر جرمانوں سے لے کر کاروبار مکمل طور پر بند کرنے تک کی سزائیں دی گئی ہیں۔
یہ مہم دارالحکومت میں روزانہ کی بنیاد پر کمرشل علاقوں کی نگرانی کے وسیع منصوبے کا حصہ ہے، جس میں ٹیکنالوجی کے ذریعے خلاف ورزیوں کو فوری ریکارڈ کیا جاتا ہے تاکہ بروقت کارروائی اور فالو اپ کیا جا سکے۔
حکام کے مطابق اس کارروائی کا ایک حصہ ان شکایات پر مبنی تھا جو شہریوں نے "مدینتی” ایپ کے ذریعے تصاویر اور جی پی ایس لوکیشن کے ساتھ درج کرائی تھیں۔ حکام نے زور دیا کہ ایسے آپریشنز کی کامیابی کے لیے کمیونٹی کا تعاون نہایت اہم ہے تاکہ خوراک کی حفاظت، شہری معیارِ زندگی اور ریاض کے طویل مدتی ترقیاتی اہداف کو یقینی بنایا جا سکے۔
