خلیج اردو
دبئی کے حکمران اور متحدہ عرب امارات کے نائب صدر شیخ محمد بن راشد المکتوم نے عوام سے اپیل کی ہے کہ وہ 3 نومبر 2026 کو پرچم ڈے کے موقع پر قومی پرچم بلند کریں۔ انہوں نے شہریوں، رہائشیوں، سرکاری و نجی اداروں، وزارتوں، سکولوں، جامعات اور گھروں پر زور دیا کہ متحدہ عرب امارات کا پرچم فخر اور وقار کے ساتھ لہرایا جائے۔
متحدہ عرب امارات میں ہر سال 3 نومبر کو پرچم ڈے منایا جاتا ہے۔ یہ دن ملک کے اتحاد، قومی اقدار سے وابستگی، وفاداری اور تشکر کی علامت سمجھا جاتا ہے۔ شیخ محمد بن راشد المکتوم نے 11 دسمبر 2012 کو اس دن کو سالانہ تقریب کے طور پر منانے کا اعلان کیا تھا، جبکہ پہلی بار یہ دن 2013 میں منایا گیا۔
شیخ محمد بن راشد نے منگل کو اپنے پیغام میں قومی پرچم کو بلند، باوقار اور فخر کے ساتھ لہرانے کی اپیل کی۔ پرچم ڈے کے موقع پر ملک بھر میں اہم عمارتوں، ساحلوں اور عوامی مقامات کو قومی پرچموں سے سجایا جاتا ہے۔
گزشتہ دو برس سے پرچم ڈے کو متحدہ عرب امارات کے قومی تقریبات کے مہینے کے آغاز کے طور پر بھی منایا جا رہا ہے۔ یہ سلسلہ 2 دسمبر کو عید الاتحاد، یعنی متحدہ عرب امارات کے قومی دن، تک جاری رہتا ہے۔
