خلیج اردو: متحدہ عرب امارات نے مشرق وسطی کی صورتحال پر اقوام متحدہ کی سلامتی کونسل کے اجلاس کے دوران حوثیوں کی جانب سے بحیرہ احمر میں متحدہ عرب امارات کے جھنڈے والے شہری کارگو جہاز پر قبضے کو قزاقی کی کارروائی قرار دیتے ہوئے اس عمل کی شدید مذمت کی ہے۔
شہری کارگو جہاز، جسے RWABEE کے نام سے جانا جاتا ہے، 3 جنوری کو حوثیوں نے اپنے قبضے میں لے لیا تھا۔ اجلاس میں سلامتی کونسل کے کئی ارکان نے بھی جہاز کو قبضے میں لینے کی مذمت کی۔ متعدد ممالک اور تنظیموں نے حوثیوں کے RWABEE پر قبضے کی مذمت کرتے ہوئے بیانات جاری کیے ہیں۔
اقوام متحدہ میں متحدہ عرب امارات کی مستقل نمائندہ لانا نسیبہ نے کہا، "ہم حدیدہ کی بندرگاہ کے قریب شہری کارگو جہاز ‘RWABEE’ کے خلاف بحری قزاقی کے حوثی عمل کی سخت ترین الفاظ میں مذمت کرتے ہیں۔” "یہ بحیرہ احمر میں میری ٹائم نیویگیشن کی حفاظت کے خلاف ایک خطرناک عمل ہے۔ اس کے لیے سلامتی کونسل کی طرف سے ایک مضبوط موقف اپنانے کی ضرورت ہے۔ ہم ان تمام ممالک کا شکریہ ادا کرتے ہیں جنہوں نے بحری قزاقی کے اس فعل کی مذمت کرتے ہوئے بیانات جاری کیے ہیں۔”
سفیر نسیبہ نے اس بات پر زور دیا کہ یمن میں بحران کے خاتمے میں پیش رفت اس وقت تک ممکن نہیں ہو گی جب تک حوثی ملیشیا یمنی عوام کے خلاف دشمنی اور بار بار کی خلاف ورزیاں بند نہیں کر دیتے۔ انہوں نے حوثیوں کی جانب سے ڈرونز اور بیلسٹک میزائلوں کا استعمال کرتے ہوئے سعودی عرب کی سرزمین کو نشانہ بنانے کی کوشش کی بھی شدید مذمت کی جو کہ بین الاقوامی قوانین کی صریح خلاف ورزی ہے۔
سفیر نسیبہ نے یمن کے عوام کو اتفاق رائے تک پہنچنے، ریاض معاہدے کے مطابق یمنی عوام کو متحد کرنے اور یمن کے قومی مفاد کو ترجیح دینے کی اہمیت پر زور دیا۔
