خلیج اردو
ابوظبی بگ ٹکٹ کے 3 دسمبر کے لائیو شو میں ماہِ نومبر کا جیک پاٹ ونر اعلان کیا گیا، جس میں سعودی عرب میں مقیم بھارتی باشندے راجن پی وی نے 2 کروڑ 50 لاکھ درہم کا عظیم انعام جیت لیا۔ 52 سالہ راجن، جو گزشتہ 30 برس سے اپنے اہلخانہ کے ساتھ سعودی عرب میں بطور کوالٹی کنٹرول سپروائزر کام کر رہے ہیں، 15 سال سے بگ ٹکٹ کے مستقل خریدار ہیں۔ انہوں نے 9 نومبر کو اپنا جیتنے والا ٹکٹ نمبر 282824 خریدا تھا۔
راجن نے بتایا کہ بگ ٹکٹ کے بارے میں انہوں نے پہلے دوستوں سے سنا، اور وقت کے ساتھ یہ روایت ان کے 16 قریبی دوستوں کے گروپ کے ساتھ ایک باقاعدہ سلسلہ بن گئی۔ جیت کی کال ملنے پر ان کے مطابق سب سے پہلے ذہن میں یہ بات آئی کہ دوستوں اور ان کے خاندانوں کی خوشی کیسی ہوگی۔ انہوں نے اعلان کیا کہ انعامی رقم تمام دوستوں میں برابر تقسیم کی جائے گی، جبکہ اپنے حصے سے وہ ضرورت مندوں کی مدد اور خیراتی کام کریں گے اور کچھ رقم اپنے خاندان کے لیے مخصوص رکھیں گے۔
بگ ٹکٹ کی ڈریم کار سیریز کے تحت بدھ کے ڈرا میں ابوظبی میں مقیم بنگلہ دیشی شہری محمد روبیل صدیق احمد نے Maserati Grecale جیتی، جس کا ٹکٹ نمبر 020002 تھا اور انہوں نے 17 نومبر کو یہ ٹکٹ خریدا تھا۔
اس ماہ کے ڈرا میں دس خوش نصیب افراد نے ایک لاکھ درہم کے کنسولیشن انعامات بھی جیتے، جن میں دبئی، عجمان، ابوظبی اور راس الخیمہ میں مقیم بھارتی، بنگلہ دیشی، فلپائنی، چینی اور کینیڈین شہری شامل ہیں۔
بگ ٹکٹ نے حالیہ مہینوں میں لگاتار بڑی جیتوں کا اعلان کیا ہے۔ 3 نومبر کے ڈرا میں بھی ایک بھارتی شہری نے 2 کروڑ 50 لاکھ درہم جیتے، جبکہ اکتوبر میں ابوظبی میں مقیم سراؤنان وینکٹاچالم نے یہی رقم جیتی تھی، جو بدھ کے ڈرا میں موجود تھے اور انہوں نے نومبر کے جیک پاٹ ونر کا ٹکٹ خود نکالا۔
