متحدہ عرب امارات میں واٹس ایپ سروس متاثر، سیکڑوں صارفین کی شکایات

خلیج اردو
دبئی:متحدہ عرب امارات میں جمعہ، 28 فروری کی شام واٹس ایپ صارفین کو سروس میں خلل کا سامنا کرنا پڑا، جس کے باعث سینکڑوں افراد نے مسائل کی شکایات درج کرائیں۔

ذرائع کے مطابق، تقریباً شام 7 بجے صارفین نے downdetector.ae پر رپورٹ کیا کہ وہ واٹس ایپ پر پیغامات بھیجنے اور وصول کرنے میں مشکلات کا سامنا کر رہے ہیں۔

شام 7:37 بجے تک تقریباً 900 سے زائد صارفین نے اس ایپلیکیشن میں خرابی کی شکایت کی، جس سے ظاہر ہوتا ہے کہ مسئلہ بڑے پیمانے پر پیش آیا۔ تاہم، واٹس ایپ انتظامیہ کی جانب سے فوری طور پر کسی خرابی کی تصدیق یا وضاحت نہیں دی گئی۔

صارفین سروس کی بحالی کے منتظر ہیں جبکہ یہ واضح نہیں ہو سکا کہ یہ عارضی خلل تھا یا کسی تکنیکی مسئلے کی وجہ سے پیش آیا۔