وقفوں میں چلنے کی ورزش، صحت مند زندگی کا آسان مگر مؤثر راز

خلیج اردو

دبئی: دنیا بھر میں فٹنس کے شوقین افراد کے درمیان ’’انٹروَل واکنگ‘‘ یعنی وقفوں میں چلنے کی ورزش تیزی سے مقبول ہو رہی ہے۔ اسے جاپانی واکنگ بھی کہا جاتا ہے اور ماہرین کے مطابق یہ مصروف زندگی میں فٹ رہنے کا ایک سائنسی طور پر مؤثر طریقہ ہے۔

یہ ورزش تیز اور سست رفتار سے باری باری چلنے پر مشتمل ہوتی ہے، جسے درمیانی عمر اور بزرگ افراد بھی آسانی سے اپنا سکتے ہیں۔

طریقہ کار
ورزش کا آغاز پانچ منٹ کے ہلکے وارم اپ سے کیا جاتا ہے۔ اس کے بعد تین منٹ تیز چلنا ہوتا ہے، جیسے کسی اہم ملاقات کے لیے تاخیر ہو رہی ہو، اور پھر دو منٹ کے لیے رفتار کم کر کے سانس بحال کی جاتی ہے۔ یہ عمل 30 منٹ تک دہرایا جاتا ہے، اور ہفتے میں کم از کم چار سے پانچ بار کرنے کی سفارش کی جاتی ہے۔ فٹنس بڑھنے کے ساتھ وقفوں کا دورانیہ بھی بڑھایا جا سکتا ہے۔

ماہرین کے مطابق اس دوران آرام دہ جوتے پہننا، مناسب پانی پینا اور رفتار کی نگرانی کے لیے فٹنس ٹریکر استعمال کرنا مفید ہے، جبکہ کسی بھی طبی حالت کی صورت میں ورزش سے قبل ڈاکٹر سے مشورہ ضروری ہے۔

فوائد
وقفوں میں چلنے سے خون کی گردش بہتر ہوتی ہے، جس سے جسم کو زیادہ آکسیجن ملتی ہے اور توانائی میں اضافہ ہوتا ہے۔ جاپان کی شِنشو یونیورسٹی کی 2024 کی تحقیق کے مطابق یہ ورزش بلڈ پریشر میں 8 فیصد تک کمی لا سکتی ہے۔

یہ ورزش عام چہل قدمی کے مقابلے میں زیادہ کیلوریز جلاتی ہے، جس سے وزن میں کمی اور جسمانی برداشت میں اضافہ ہوتا ہے۔ پروفیسر ہیروشی نوسے کی 2011 کی تحقیق کے مطابق وقفوں میں چلنے سے دل اور پھیپھڑوں کی صلاحیت میں نمایاں بہتری آتی ہے۔

بزرگ افراد کے لیے یہ ورزش جوڑوں کے لیے محفوظ سمجھی جاتی ہے، جس سے چوٹ لگنے کے امکانات کم ہو جاتے ہیں۔ یہی وجہ ہے کہ جاپان کی بڑھتی عمر کی آبادی میں اس کی مقبولیت میں تیزی سے اضافہ ہو رہا ہے۔

ماہرین کا کہنا ہے کہ چاہے مقصد وزن کم کرنا ہو، دل کی صحت بہتر بنانا ہو یا جسمانی برداشت بڑھانا، وقفوں میں چلنا صحت مند زندگی کے لیے بہترین اور آسان نسخہ ہے۔