خلیج اردو
رائے پور: بھارت کی ریاست چھتیس گڑھ میں منگل کے روز ایک خوفناک ریلوے حادثے میں چار افراد جاں بحق اور متعدد زخمی ہوگئے جب گیورا روڈ سے بلاسپور جانے والی میمو مسافر ٹرین ایک کھڑی ہوئی مال گاڑی سے ٹکرا گئی۔ حادثہ سہ پہر چار بجے کے قریب بلاسپور اسٹیشن کے قریب گاتورا اور بلاسپور کے درمیان جنوبی مشرقی سنٹرل ریلوے زون میں پیش آیا۔
بلاسپور کے کلکٹر سنجے اگروال کے مطابق چار ہلاکتوں کی تصدیق ہو چکی ہے جبکہ دو افراد اب بھی ملبے تلے پھنسے ہوئے ہیں جنہیں نکالنے کے لیے ریسکیو ٹیمیں ہائیڈرولک کٹرز کا استعمال کر رہی ہیں۔ عینی شاہدین کے مطابق حادثے کی شدت اتنی زیادہ تھی کہ مسافر کوچ مال گاڑی کے ڈبوں کے اوپر چڑھ گیا۔
ابتدائی رپورٹس کے مطابق ایک سگنل کی خرابی کے باعث دونوں ٹرینیں ایک ہی ٹریک پر آگئیں۔ حادثے کی تحقیقات جاری ہیں جبکہ ریلوے حکام نے متبادل روٹس پر ٹرینوں کو موڑ دیا ہے۔ بلاسپور کے ڈویژنل ریلوے مینیجر راجمل کھویوال اور جنرل مینیجر ترن پرکاش نے جائے وقوعہ پر پہنچ کر ریسکیو آپریشن کی نگرانی کی۔
زخمیوں کو قریبی اسپتالوں میں منتقل کر دیا گیا ہے اور متاثرہ خاندانوں کے لیے ہیلپ لائن نمبرز جاری کر دیے گئے ہیں۔ حکام نے متاثرین کے لیے معاوضے کا اعلان تحقیقات مکمل ہونے کے بعد کرنے کا کہا ہے۔
