خلیج اردو
متحدہ عرب امارات کے مختلف علاقوں میں پیر 19 اکتوبر کو بارش کا سلسلہ جاری رہا، فجیرہ میں ژالہ باری ہوئی جبکہ شارجہ میں بارش سے بھیگی سڑک پر اونٹ کی چہل قدمی کی ویڈیو بھی سامنے آگئی۔
اسٹارم سینٹر کی جانب سے شیئر کی گئی ویڈیوز میں فجیرہ کے علاقوں مربح اور مسافی میں بارش اور ژالہ باری کے مناظر دیکھے جاسکتے ہیں۔ بارش کے باعث موسم میں خوشگوار تبدیلی محسوس کی گئی۔
شارجہ کے بعض علاقوں، خصوصاً المدیم اور مرغم میں بھی بارش ہوئی۔ بارش کے دوران سڑکوں پر گاڑیوں کے ساتھ ایک اونٹ بھی چلتا دکھائی دیا، جس کی ویڈیو سوشل میڈیا پر توجہ کا مرکز بن گئی۔ المدیم میں آسمان پر گہرے بادل چھائے رہے اور بعض مقامات پر تیز بارش ہوتی رہی۔
یہ مناظر ایسے وقت سامنے آئے ہیں جب متحدہ عرب امارات کے محکمہ موسمیات نے پیر کو ملک کے بعض حصوں میں بارش کی پیش گوئی کی تھی۔
متحدہ عرب امارات کے قومی مرکز برائے موسمیات نے اس سے قبل خبردار کیا تھا کہ ایل نینو موسمیاتی رجحان کے 2027 کے اوائل تک برقرار رہنے کے امکان کے باعث آنے والے مہینوں میں ملک میں اوسط سے زیادہ بارش ہوسکتی ہے۔
تازہ موسمیاتی جائزے کے مطابق مارچ 2027 تک ایل نینو کی صورتحال برقرار رہنے کا امکان 96 فیصد ہے۔ اس دوران درجہ حرارت اور بارش ملک میں معمول کی اوسط سے زیادہ ہوسکتے ہیں۔ پیش گوئی کے مطابق اکتوبر اور نومبر 2026 میں یہ رجحان اپنے عروج پر پہنچ سکتا ہے، جبکہ نینو 3.4 انڈیکس تقریباً پلس 3 ڈگری سینٹی گریڈ تک پہنچنے کا امکان ہے، جو انتہائی طاقتور ایل نینو کی نشاندہی کرتا ہے۔
تاہم محکمہ موسمیات نے واضح کیا ہے کہ ایل نینو کا مطلب لازمی طور پر متحدہ عرب امارات میں شدید بارشوں، طوفانوں یا سیلاب کا آنا نہیں۔ اس کے اثرات خطے، موسم اور مقامی موسمیاتی نظام کے مطابق مختلف ہوسکتے ہیں۔
قومی مرکز برائے موسمیات نے سوشل میڈیا پر گردش کرنے والے ان دعوؤں کو بھی مسترد کیا ہے جن میں ایل نینو کو براہ راست شدید سیلاب اور غیر معمولی بارشوں سے جوڑا گیا تھا۔ ادارے نے شہریوں پر زور دیا ہے کہ وہ موسم سے متعلق معلومات کے لیے سرکاری پیش گوئیوں اور انتباہات پر انحصار کریں۔
اس سے قبل قومی مرکز برائے موسمیات کے ماہر احمد حبیب نے خلیج ٹائمز کو بتایا تھا کہ متحدہ عرب امارات میں ایل نینو کے اثرات خزاں کے موسم، خصوصاً اکتوبر اور نومبر میں زیادہ نمایاں ہوسکتے ہیں۔ ان کے مطابق موسم گرما میں اس رجحان کے اثرات مشرقی ایشیا میں زیادہ مضبوط ہوتے ہیں، تاہم خزاں میں متحدہ عرب امارات سمیت مغربی ایشیا کے خطے میں اس کا اثر محسوس ہونے کا امکان ہے۔
احمد حبیب نے مزید کہا کہ ایل نینو متحدہ عرب امارات میں فضا میں نمی کی مقدار بڑھا سکتا ہے اور بارش کے امکانات میں اضافہ کرسکتا ہے، تاہم اس کا انحصار مقامی موسمی حالات پر ہوگا۔
