خلیج اردو
پاک فوج کے شعبہ تعلقاتِ عامہ کے مطابق پاکستان بحریہ نے اعلیٰ تیاری اور درست نشانہ لگانے کی صلاحیت کا مظاہرہ کرتے ہوئے مقامی طور پر تیار کردہ جہاز سے داغا جانے والا اینٹی شپ میزائل کامیابی سے فائر کیا، جس نے دور فاصلے پر اپنے ہدف کو انتہائی رفتار کے ساتھ درست طور پر نشانہ بنایا۔
میزائل کے تجربے کا مشاہدہ چیف آف دی نیول اسٹاف ایڈمرل نوید اشرف نے ممتاز سائنسدانوں اور انجینئرز کے ہمراہ کیا۔ اس موقع پر میزائل کی جدید ٹیکنالوجی اور آپریشنل مہارت کا عملی مظاہرہ کیا گیا۔
آئی ایس پی آر کے مطابق میزائل جدید رہنمائی نظام اور اعلیٰ درجے کی چال بازی کی صلاحیت سے لیس ہے، جو اسے خطرات سے بچنے، بدلتی صورتحال سے ہم آہنگ ہونے اور ہدف کو انتہائی درستگی سے نشانہ بنانے کے قابل بناتی ہے۔ یہ کامیاب تجربہ پاکستان کی تکنیکی برتری اور دفاعی خود انحصاری کا مظہر ہے۔
بیان میں کہا گیا کہ یہ کامیابی پاکستان بحریہ کے روایتی دفاعی دائرے میں مؤثر سمندری دفاع کو برقرار رکھنے اور خطے میں بحری سلامتی و استحکام یقینی بنانے کے عزم کی عکاسی کرتی ہے۔ صدر مملکت، وزیر اعظم، چیف آف ڈیفنس فورسز اور مسلح افواج کے سربراہان نے اس اہم سنگ میل کے حصول پر سائنسدانوں اور شریک یونٹس کو مبارکباد پیش کی۔
