فواد چوہدری کی پی ٹی آئی قیادت پر تنقید، گرینڈ الائنس بنانے میں ناکامی کا ذمہ دار ٹہرا دیا

خلیج اردو
لاہور:سابق وفاقی وزیر فواد چوہدری ایک بار پھر پاکستان تحریک انصاف (پی ٹی آئی) کی قیادت کے خلاف بول پڑے۔ لاہور میں میڈیا سے گفتگو کرتے ہوئے انہوں نے کہا کہ موجودہ پی ٹی آئی عہدیداروں کا کوئی سیاسی بیک گراؤنڈ نہیں اور وہ اب تک گرینڈ الائنس بنانے میں ناکام رہے ہیں۔

فواد چوہدری نے کہا کہ پارٹی قیادت موجودہ حالات سے فائدہ نہیں اٹھا رہی، جبکہ ملک میں اسٹریٹ پاور صرف مولانا فضل الرحمان اور پی ٹی آئی کے پاس ہے۔ ان کے مطابق، نااہل اپوزیشن اور کمزور حکومت کے درمیان عوام پسے جا رہے ہیں۔

انہوں نے کہا کہ موجودہ حکومت چل نہیں رہی بلکہ گھسٹ رہی ہے، اور الیکشن میں شکست کھانے کے بعد دھاندلی ہی ان کے پاؤں کی بیڑیاں بنی ہوئی ہیں۔ فواد چوہدری نے مزید کہا کہ یہ حکومت ہر طبقے سے بلیک میل ہو رہی ہے۔

انہوں نے حکومت کو مشورہ دیا کہ انتقام کے کلچر کو ختم کیا جائے اور کہا کہ بانی پی ٹی آئی کی واپسی صرف تحریک کے ذریعے ممکن ہے۔ ان کا کہنا تھا کہ وہ بانی پی ٹی آئی سے مل کر تحریک چلانے کی اجازت لیں گے۔

فواد چوہدری کے ان بیانات سے واضح ہوتا ہے کہ وہ نہ صرف پی ٹی آئی قیادت کی کارکردگی پر عدم اطمینان کا اظہار کر رہے ہیں بلکہ ملکی سیاست میں موجودہ حالات پر بھی سخت مؤقف رکھتے ہیں۔