خلیج اردو
دبئی:دبئی کے کچھ علاقوں میں اب بغیر ٹکٹ اور مکمل طور پر خودکار پارکنگ سسٹم متعارف کرایا گیا ہے، جس سے پارکنگ کا عمل مزید آسان ہوگیا ہے۔ اب نہ کوئی انتظار کرنا پڑے گا، نہ ہی ٹکٹ لینا ہوگا، بس گاڑی پارک کریں اور چلے جائیں۔
یہ نظام زمین پر نصب سینسرز اور کیمروں کے ذریعے کام کرتا ہے، جو گاڑی کے نمبر پلیٹ کو اسکین کرکے خودکار طور پر پارکنگ فیس کا حساب لگاتے ہیں۔ گاڑی کے داخلے اور باہر نکلنے کے وقت کو ریکارڈ کیا جاتا ہے، اور صارف کو کسی بھی طرح کی تفصیلات درج کرنے کی ضرورت نہیں ہوتی۔
یہ جدید پارکنگ سسٹم پام جمیرا کے ایسٹ کریسنٹ میں رکسوس اور انانتارا ہوٹلز کے درمیان متعارف کرایا گیا ہے۔ یہاں 2022 سے باضابطہ طور پر ادا شدہ پارکنگ لاگو ہے اور پہلے بھی بغیر نقدی ادائیگی والے میٹرز نصب کیے گئے تھے۔ تاہم، یہ سسٹم روڈز اینڈ ٹرانسپورٹ اتھارٹی یا پارکنگ آپریٹر پارکن PJSC کے بجائے نجی کمپنی پارکونک کے ذریعے چلایا جا رہا ہے۔
پارکنگ فیس 10 درہم فی گھنٹہ مقرر کی گئی ہے اور یہ سہولت ہفتے کے ساتوں دن، چوبیس گھنٹے دستیاب ہوگی۔ ادائیگی پارکونک ویب سائٹ، کیو آر کوڈ، نقد، کریڈٹ کارڈ یا ادائیگی کے بوتھز پر کی جا سکتی ہے۔ پارکونک کا عملہ بھی مدد کے لیے موجود ہوگا۔
پارکونک نے حال ہی میں دبئی ہاربر میں ایک خودکار پارکنگ سسٹم بھی متعارف کرایا ہے، جو مصنوعی ذہانت کی مدد سے کام کرتا ہے۔ اس نظام میں دبئی کے ٹول گیٹ آپریٹر سالق کے ساتھ شراکت کی گئی ہے۔ یہاں گاڑی کے نمبر پلیٹ کی شناخت کے بعد، پارکنگ فیس خود بخود سالق اکاؤنٹ سے منہا کر لی جاتی ہے، جیسا کہ دبئی مال میں جولائی 2023 سے نافذ ہے۔
پارکونک نے ملک کے مختلف علاقوں میں پارکنگ کی سہولیات متعارف کرائی ہیں، جن میں دبئی کے گلوبل ولیج، جے بی آر کا دی بیچ، اور سینٹرل پارک شامل ہیں۔ ابوظبی میں آرک ٹاورز، شیخ زاید فیسٹیول اور مرسا البطین، جبکہ شارجہ میں خورفکان بیچ، القصبہ، ہارٹ آف شارجہ اور المجاز پارک میں بھی یہ نظام نافذ کیا گیا ہے۔ فجیرہ میں امبریلا بیچ پر بھی پارکونک کی سہولت فراہم کی گئی ہے۔
پارکونک اور سالق کے درمیان پانچ سالہ معاہدے کے تحت، سالق کو پارکونک کی کمائی سے مخصوص حصہ ملے گا، اور سالق کی ای-والٹ کو بطور ادائیگی کا بنیادی چینل استعمال کیا جائے گا۔ یہ معاہدہ متحدہ عرب امارات میں پارکونک کے ایک لاکھ پینتیس ہزار سے زائد پارکنگ اسپیسز کا احاطہ کرے گا۔
