اگر بھارت نے فضائی حملے کیے تو پاکستان اس کے مطابق جواب دے گا، اور اگر بھارت نے مکمل جنگ چھیڑی تو پھر جنگ ہوگی،بھارت کو دو ٹوک پیغام، وزیر دفاع خواجہ آصف کا انٹرویو

خلیج اردو
وزیر دفاع خواجہ آصف نے سکائی نیوز کو انٹرویو دیتے ہوئے بھارت کو دو ٹوک پیغام دیا کہ اگر بھارت نے فضائی حملے کیے تو پاکستان اس کے مطابق جواب دے گا، اور اگر بھارت نے مکمل جنگ چھیڑی تو پھر جنگ ہوگی۔ ان کا کہنا تھا کہ پاکستان کی فوج ہر طرح کی صورتحال کے لیے تیار ہے۔ خواجہ آصف نے مقبوضہ کشمیر میں بھارت کی طرف سے کیے جانے والے واقعات پر کہا کہ بھارت نے کبھی ان کے ثبوت نہیں دیے، اور وہ ہمیشہ اپنے فائدے کے لیے ایسی صورتحال پیدا کرتا ہے۔ انہوں نے پلوامہ حملے کو بھی ایک سازش قرار دیتے ہوئے کہا کہ پاکستان اس معاملے میں درست ثابت ہوا۔
خواجہ آصف نے کہا کہ بھارت نے فضائی حملہ کیا، لیکن وہ نقصان اٹھا کر خاموش ہوگیا۔ انہوں نے مزید کہا کہ سندھ طاس معاہدے کی معطلی سے کشیدگی بڑھے گی، اور اگر جنگ ہوئی تو یہ نہ صرف خطے بلکہ پوری دنیا کو متاثر کرے گی۔ وزیر دفاع نے خبردار کیا کہ جوہری طاقتوں کے درمیان تصادم ہمیشہ تشویشناک ہوتا ہے، اور اگر معاملات بگڑ گئے تو اس کا انجام انتہائی خطرناک ہو سکتا ہے۔
انہوں نے کہا کہ امریکہ کے سابق صدر ڈونلڈ ٹرمپ دنیا کی واحد طاقت کے سربراہ ہیں، اور اگر وہ مداخلت کریں تو یہ خوش آئند ہوگا۔ خواجہ آصف نے زور دیا کہ کشیدگی کو بڑھانے کے بجائے اسے کم کرنے کی کوشش کی جانی چاہیے۔