دبئی مال کے ریسٹورنٹ میں ولی عہد کا دل جیت لینے والا عمل — تمام کھانے کے بل خود ادا کر دیے

خلیج اردو
دبئی: دبئی کے ولی عہد شیخ حمدان بن محمد بن راشد المکتوم نے ایک بار پھر اپنے عوام دوستی اور سخاوت سے دل جیت لیے۔ بدھ کے روز دبئی مال میں واقع مشہور ریسٹورنٹ La Maison Ani میں دوپہر کے کھانے کے دوران انہوں نے نہ صرف خود کھانے کا لطف اٹھایا بلکہ ریسٹورنٹ میں موجود تمام مہمانوں کے بل بھی خود ادا کر دیے۔

ریسٹورنٹ میں موجود اماراتی خاتون نورہ محمد المرزوقی نے بتایا کہ انہیں معلوم نہیں تھا کہ وہ کس خوشگوار حیرت کا سامنا کرنے والی ہیں۔
"میں جیسے ہی کھانے کے بعد بل مانگنے گئی تو مجھے بتایا گیا کہ شیخ حمدان نے سب کا بل ادا کر دیا ہے۔ یہ صرف یو اے ای میں ہی ممکن ہے کہ شاہی خاندان اتنی سادگی اور محبت سے عوام کے ساتھ گھل مل جائے اور ایسا تجربہ زندگی بھر کے لیے یادگار بنا دے۔”

شیخ حمدان کے ساتھ اس موقع پر ابوظبی کے ولی عہد شیخ خالد بن محمد بن زاید النہیان بھی موجود تھے۔ دونوں رہنما اپنے مشیروں اور دوستوں کے ہمراہ غیر رسمی ماحول میں ریسٹورنٹ آئے، عام شہریوں سے مسکرا کر سلام کیا اور پرسکون انداز میں کھانے کا لطف اٹھایا۔

ریسٹورنٹ La Maison Ani، جو معروف شیف ازو انی کے زیرِ انتظام ہے، نے شاہی مہمانوں کی آمد کو اپنے لیے "اعزاز اور فخر” قرار دیا۔ ایک بیان میں انہوں نے کہا:
"ان کے حضور کو خوش آمدید کہنا ہمارے لیے باعث فخر تھا۔ یہ لمحے اس اعتماد کی علامت ہیں جو ہم پر معیار کی فراہمی کے حوالے سے رکھا جاتا ہے۔ ان کی موجودگی نے پورے ماحول کو خوبصورت بنا دیا، اور تمام مہمانوں کے لیے یادگار لمحے پیدا کیے۔”

ریسٹورنٹ کے مطابق شیخ حمدان اور شیخ خالد کی موجودگی نہایت خوشگوار اور باوقار رہی، اور انہوں نے پورے ماحول کو شفقت اور اپنائیت سے بھر دیا۔