خلیج اردو
غزہ: حماس کے زیر انتظام فلسطینی وزارت صحت نے انکشاف کیا ہے کہ گذشتہ 48 گھنٹوں کے دوران غذائی قلت کے باعث 12 بچوں سمیت 33 افراد جاں بحق ہو چکے ہیں۔ وزارت کے مطابق امدادی سامان کی شدید قلت اور خوراک کی عدم دستیابی کے باعث حالات نہایت تشویشناک رخ اختیار کر چکے ہیں۔
اقوام متحدہ کے سیکریٹری جنرل نے خبردار کیا ہے کہ غزہ میں جانیں بچانے کے تمام وسائل ختم ہوتے جا رہے ہیں، جب کہ اسرائیلی حملوں میں شدت آنے سے صورتحال مزید ابتر ہو چکی ہے۔
برطانیہ سمیت 20 سے زائد ممالک نے پیر کے روز ایک مشترکہ بیان میں اسرائیلی کارروائیوں کی مذمت کرتے ہوئے نہ صرف فوری جنگ بندی کا مطالبہ کیا بلکہ یرغمال بنائے گئے افراد کی فوری رہائی پر بھی زور دیا۔
عالمی ادارہ صحت کا کہنا ہے کہ اسرائیلی فوج کی جانب سے مرکزی غزہ کے علاقے میں نئی زمینی کارروائیوں کے باعث امدادی کاموں میں خلل پڑا ہے۔ ادارے کے مطابق دیر البلاح کے علاقے میں اسرائیلی دستوں پر فائرنگ کے بعد سکیورٹی کی صورتحال مزید خراب ہوئی ہے، تاہم اسرائیلی حکام کا دعویٰ ہے کہ بین الاقوامی امدادی تنظیموں سے رابطے بحال رکھے جا رہے ہیں۔
غزہ میں جاری جنگ اور محاصرے کی وجہ سے انسانی المیہ گہرا ہوتا جا رہا ہے، جب کہ عالمی برادری کی جانب سے بڑھتے ہوئے ردعمل کے باوجود اسرائیلی کارروائیاں جاری ہیں۔
