خلیج اردو
متحدہ عرب امارات کی مساجد میں جمعے کے روز نماز استسقا ادا کی جائے گی، جس کا مقصد بارش کے لیے اللہ تعالیٰ سے رحمت طلب کرنا ہے۔ صدر شیخ محمد بن زاید النہیان نے شہریوں اور مقیم افراد سے اپیل کی ہے کہ وہ نماز جمعہ سے آدھا گھنٹہ قبل یہ خصوصی نماز ادا کریں۔
خلیج ٹائمز کے مطابق دبئی کی مساجد میں نماز استسقا دوپہر 12 بج کر 15 منٹ پر، جبکہ شارجہ میں صبح 11 بج کر 38 منٹ پر ادا کی جائے گی۔ یہ نماز معمول کی نماز جمعہ سے تقریباً آدھا گھنٹہ پہلے ادا کرنے کا اہتمام کیا گیا ہے۔
متحدہ عرب امارات کی فتویٰ کونسل کے مطابق نماز استسقا بارش میں تاخیر کے دوران اللہ تعالیٰ کی رحمت طلب کرنے، ایمان کی تجدید، عاجزی اختیار کرنے اور سچے دل سے توبہ و دعا کرنے کا موقع فراہم کرتی ہے۔ اس نماز کے ذریعے مسلمان اللہ تعالیٰ سے زمین اور اس کے باشندوں کے لیے بارش، خیر و برکت، امن اور خوشحالی کی دعا کرتے ہیں۔
نماز استسقا کا مقصد اللہ تعالیٰ سے مغفرت طلب کرنا اور اس کی بارگاہ میں عاجزی کے ساتھ بارش کی درخواست کرنا ہے۔ اس موقع پر ملک کی سلامتی، ترقی اور خوشحالی کے لیے بھی دعائیں کی جاتی ہیں، جبکہ آسمان سے رحمت اور زمین سے خیر و برکت عطا ہونے کی التجا کی جاتی ہے۔
نماز استسقا ادا کرنا نبی کریم حضرت محمد ﷺ کی سنت اور تعلیمات کی پیروی ہے۔ آپ ﷺ نے بارش میں تاخیر کے دوران مسلمانوں کو اللہ تعالیٰ سے بارش طلب کرنے کی رہنمائی فرمائی تھی۔
فتویٰ کونسل کے مطابق یہ موقع اللہ تعالیٰ کی نعمتوں، بالخصوص پانی کی اہمیت کا احساس اجاگر کرنے کا ذریعہ بھی ہے، کیونکہ پانی انسانی زندگی اور معاشرتی فلاح کے لیے بنیادی ضرورت ہے۔ نماز اور دعا کے ساتھ پانی کے تحفظ، قدرتی وسائل کے ذمہ دارانہ استعمال اور آئندہ نسلوں کے لیے پانی کی دستیابی یقینی بنانے پر بھی زور دیا گیا ہے۔
