خلیج اردو
متحدہ عرب امارات کے شہر دبئی میں شیخ زاید روڈ پر واقع ایک کار شو روم میں گیس سلنڈر پھٹنے سے ایک شخص جاں بحق جبکہ پانچ افراد زخمی ہوگئے۔
دبئی سول ڈیفنس کے مطابق حادثہ پیر 3 اگست کو پیش آیا جس کے بعد ریسکیو ٹیمیں فوری طور پر جائے وقوعہ پر پہنچیں اور زخمیوں کو طبی امداد فراہم کی گئی۔
حکام نے ابتدائی اطلاع کے ایک گھنٹے کے اندر تصدیق کی کہ دھماکے پر قابو پالیا گیا ہے، متاثرہ مقام کو محفوظ بنا دیا گیا ہے اور تمام متاثرہ افراد کو ضروری مدد فراہم کی گئی ہے۔
حکام کے مطابق متاثرین کی قومیت تاحال ظاہر نہیں کی گئی جبکہ ابتدائی تحقیقات کے حوالے سے مزید معلومات بعد میں جاری کی جاسکتی ہیں۔
دبئی سول ڈیفنس نے شہریوں کو ہدایت کی ہے کہ ایسے واقعات کے دوران صرف سرکاری ذرائع سے معلومات حاصل کریں اور افواہیں پھیلانے سے گریز کریں کیونکہ اس کے خلاف سخت قانونی کارروائی ہوسکتی ہے۔
گیس سلنڈرز کے خطرات
متحدہ عرب امارات میں موسم گرما کے دوران حکام بارہا خبردار کرچکے ہیں کہ اگر گیس سلنڈرز کو مناسب طریقے سے ذخیرہ، استعمال اور برقرار نہ رکھا جائے تو یہ خطرناک حادثات کا سبب بن سکتے ہیں۔
حفاظتی ماہرین نے رہائشیوں اور ریسٹورنٹ آپریٹرز پر زور دیا ہے کہ شدید گرمی کے دوران کھانا پکانے والی گیس کے استعمال میں اضافی احتیاط برتی جائے تاکہ آگ لگنے اور دھماکوں کے خطرات کم کیے جاسکیں۔
دبئی پولیس نے حال ہی میں غیر لائسنس یافتہ گیس سلنڈر فروخت کرنے والوں کے خلاف کارروائی کا اعلان کرتے ہوئے بتایا تھا کہ رواں سال کے آغاز سے اب تک حفاظتی معیار پر پورا نہ اترنے والے 300 سلنڈر ضبط کیے جاچکے ہیں۔
پولیس کے مطابق 2025 میں 575 جبکہ 2024 میں 1,361 گیس سلنڈر ضبط کیے گئے تھے۔
دبئی پولیس کے محکمہ جرائم کی تحقیقات نے شہریوں کو مشورہ دیا ہے کہ گیس سلنڈر صرف منظور شدہ کمپنیوں اور مجاز سپلائرز سے خریدیں کیونکہ غیر محفوظ ری فلنگ اور غیر قانونی طریقے جان و مال کے لیے خطرہ بن سکتے ہیں۔
