بنگالی روایتی کھانا صحت کیلئے مضر قرار دے دیا گیا، ریستوران سیل

خلیج اردو
ابوظہبی: ابوظہبی ایگریکلچر اینڈ فوڈ سیفٹی اتھارٹی نے صحت عامہ کے لیے براہ راست خطرہ بننے اور فوڈ سیفٹی قوانین کی سنگین خلاف ورزیوں پر ایک بنگالی کھانا پیش کرنے والے ریسٹورنٹ کو بند کرنے کا حکم دیا ہے۔

حمدان بن محمد اسٹریٹ پر واقع روپاشی بنگلہ ریسٹورنٹ ایل ایل سی، جو کمرشل لائسنس نمبر سی این-1037388 کے تحت کام کر رہا تھا، کو انسپیکشن حکام کی جانب سے ایڈمنسٹریٹو نوٹس جاری کر دیا گیا۔ اتھارٹی کے مطابق، ریسٹورنٹ 2008 کے قانون نمبر (2) اور اس سے منسلک ضوابط کی خلاف ورزی کرتے ہوئے بارہا خطرناک فوڈ سیفٹی خلاف ورزیوں میں ملوث پایا گیا۔

ریسٹورنٹ کو پہلے بھی متعدد بار وارننگز دی گئی تھیں لیکن وہ خامیوں کو دور کرنے میں ناکام رہا، جس سے صارفین کی صحت کو خطرہ لاحق ہو گیا۔ اتھارٹی نے واضح کیا کہ ریسٹورنٹ اس وقت تک بند رہے گا جب تک تمام خلاف ورزیاں ختم نہیں کی جاتیں، مکمل آپریشنل تقاضے پورے نہیں ہوتے اور صحت عامہ کو لاحق خطرات مکمل طور پر ختم نہیں کر دیے جاتے۔

یہ کارروائی پچھلے ہفتے کی گئی ان بندشوں کے سلسلے کی ایک کڑی ہے، جب مانا روچولو ریسٹورنٹ اور وافی ہائپر مارکیٹ کو بھی فوڈ سیفٹی قوانین کی سنگین خلاف ورزیوں پر بند کیا گیا تھا۔

ابوظہبی انڈسٹریل سٹی میں واقع مانا روچولو ریسٹورنٹ کو بھی شدید فوڈ سیفٹی مسائل پر بند کر دیا گیا۔ حکام کے مطابق، اس کی سرگرمیاں صحت عامہ کے لیے سنجیدہ خطرہ بن چکی تھیں، جس کے بعد فوری ریگولیٹری کارروائی کی گئی۔

مسافہ انڈسٹریل سٹی میں واقع وافی ہائپر مارکیٹ ایل ایل سی کو بھی فوڈ سیفٹی کے سخت قوانین کی بار بار خلاف ورزی کرنے پر بند کیا گیا۔ انسپیکشن کے دوران وہاں کیڑے مکوڑوں کی بھرمار، زائد المیعاد اشیاء کی فروخت اور ناقص صفائی کے مسائل سامنے آئے۔ متعدد انتباہات کے باوجود ہائپر مارکیٹ اصلاحی اقدامات کرنے میں ناکام رہی، جس پر عوامی صحت کے تحفظ کے لیے بند کرنے کا حکم جاری کیا گیا۔

اتھارٹی نے عوام سے اپیل کی ہے کہ وہ فوڈ سیفٹی کے کسی بھی ممکنہ مسئلے یا خلاف ورزی کی صورت میں ابوظہبی حکومت کے ٹول فری نمبر 800555 پر اطلاع دیں۔ اتھارٹی نے صحت مند اور معیاری خوراک کی فراہمی یقینی بنانے کے عزم کا اعادہ کیا۔