کیرفور کا بحرین سے انخلا، متحدہ عرب امارات کے ماجد الفطیم نے "ہائپر میکس” متعارف کرا دیا

خلیج اردو
دبئی: یو اے ای کے بڑے بزنس گروپ ماجد الفطیم نے پیر کے روز اعلان کیا کہ بحرین میں اپنی نئی گروسری ریٹیل برانڈ "ہائپر میکس” کا آغاز کر دیا گیا ہے۔ یہ اقدام اس وقت سامنے آیا جب کیرفور بحرین نے 14 ستمبر کو اپنی سرگرمیاں ختم کر دیں۔

ماجد الفطیم گروپ، جو مشرق وسطیٰ، افریقہ اور ایشیا کے 12 ممالک میں کیرفور کے خصوصی آپریٹنگ حقوق رکھتا ہے، نے بتایا کہ بحرین میں اب ہائپر میکس کے 6 اسٹورز فعال ہو جائیں گے۔ اس سے قبل رواں سال کے آغاز میں عمان میں بھی کیرفور کی جگہ ہائپر میکس نے لے لی تھی، جبکہ گزشتہ سال نومبر میں اردن میں کیرفور اسٹورز بند کر دیے گئے تھے۔

ہائپر میکس بحرین کے آپریشنز کے سربراہ محمد الخطیب نے کہا کہ یہ اقدام صارفین اور مقامی کمیونٹیز کو ترجیح دینے کے ماجد الفطیم کے عزم کا حصہ ہے۔ انہوں نے کہا کہ "مقامی سورسنگ کو فروغ دے کر ہم ایک ایسا متحرک نظام تشکیل دے رہے ہیں جو صارفین کو تازہ اور معیاری اشیائے خوردونوش زیادہ سہولت اور مناسب قیمتوں پر فراہم کرے گا۔”

بحرین میں ہائپر میکس 1,600 افراد کو روزگار فراہم کر رہا ہے اور 250 سے زائد بحرینی کسانوں، سپلائرز اور چھوٹے و درمیانے کاروباروں کے ساتھ شراکت داری کر رہا ہے تاکہ پائیدار سپلائی چین قائم کی جا سکے اور مقامی کاروبار کو تقویت ملے۔