خلیج اردو
دبئی میں اب ایک ایسا منصوبہ شروع کیا جا رہا ہے جس کے تحت دنیا کی پہلی رہائشی ولا مکمل طور پر روبوٹک تعمیراتی نظام کے ذریعے بنائی جائے گی۔
یہ عالمی منصوبہ دبئی میونسپلٹی کی قیادت میں ایک مقامی و بین الاقوامی کنسورشیم کے ذریعے نافذ کیا جائے گا، جس میں 25 سے زائد جدید ٹیکنالوجی کمپنیوں اور تعلیمی اداروں کی شراکت شامل ہوگی۔
منصوبے میں Zacua Ventures اور Würth Group کے ساتھ ساتھ مقامی ٹھیکیدار اور انجینئرنگ فرمیں، اور خصوصی تعمیراتی روبوٹکس کمپنیوں کی شمولیت ہوگی۔
یہ اعلان دبئی ایکسپو سٹی کے تعاون سے قائم کیے گئے کنسٹرکشن انوویشن اینڈ ریسرچ سینٹر (04 ConTech Valley) کے فعال ہونے کے موقع پر کیا گیا، جس کا مقصد تعمیراتی مواد، نظام اور ٹیکنالوجیز میں تحقیق اور جدت کو فروغ دینا اور مستقبل کے شہری انفراسٹرکچر کے لیے حل فراہم کرنا ہے۔
اس موقع پر دبئی میونسپلٹی نے Zacua Ventures کے تعاون سے گلوبل ConTech رپورٹ بھی جاری کی، جس میں بتایا گیا کہ تعمیراتی ٹیکنالوجیز میں سرمایہ کاری 2033 تک 30 ارب ڈالر سے تجاوز کر جائے گی اور سالانہ نمو کی شرح 17.5 فیصد ہوگی۔ رپورٹ میں لیبر کی کمی کو عالمی تعمیراتی صنعت کا بڑا چیلنج قرار دیا گیا اور روبوٹکس، ایڈٹیو مینوفیکچرنگ، مصنوعی ذہانت، انفراسٹرکچر ٹیکنالوجی اور پری فیبریکیشن جیسے شعبوں میں سرمایہ کاری کے امکانات اجاگر کیے گئے ہیں۔
دبئی میونسپلٹی اور Sobha Realty نے 70–70 حکمت عملی بھی متعارف کرائی، جس کا مقصد 2030 تک 70 فیصد تعمیرات کو آف سائٹ مینوفیکچرنگ پر منتقل کرنا اور فیکٹریوں میں کم از کم 70 فیصد خودکاری حاصل کرنا ہے، جس سے معیار، کارکردگی اور پائیداری میں اضافہ ہوگا۔
اس تقریب میں عوامی اور نجی شعبے کے شراکت داروں، تعمیراتی ٹیکنالوجی اسٹارٹ اپس کے ساتھ تعمیراتی شعبے میں مواقع اور چیلنجز پر بات چیت کی گئی اور ٹیکنالوجی کی ترقی کے لیے حکمت عملی وضع کی گئی۔
مزید برآں، دبئی میونسپلٹی نے چائنا اسٹیٹ کنسٹرکشن انجینئرنگ کارپوریشن کو اس کے ماڈیولر تعمیراتی نظام کے لیے منظور کر لیا، جبکہ AMANA بھی ماڈیولر تعمیراتی نظام کو استعمال کرتے ہوئے نوجوانوں کے لیے پبلک سہولیات میں مشترکہ کام کی جگہیں تیار کرے گا۔
ماہرین کے مطابق یہ منصوبہ نہ صرف دبئی کی تعمیراتی صنعت میں جدیدیت لائے گا بلکہ مستقبل کے شہر کی تعمیر میں خودکاری، معیار اور پائیداری کو فروغ دینے میں کلیدی کردار ادا کرے گا۔
