دبئی کے ولی عہد شیخ حمدان کو متحدہ عرب امارات کی مسلح افواج میں لیفٹیننٹ جنرل کے عہدے پر ترقی

خلیج اردو
متحدہ عرب امارات کے صدر اور مسلح افواج کے سپریم کمانڈر شیخ محمد بن زاید النہیان نے ایک اہم فیصلے کے تحت دبئی کے ولی عہد شیخ حمدان بن محمد بن راشد المکتوم کو لیفٹیننٹ جنرل کے عہدے پر ترقی دینے کا وفاقی فرمان جاری کر دیا ہے۔

شیخ حمدان، جو دبئی کے ولی عہد ہونے کے ساتھ ساتھ متحدہ عرب امارات کے نائب وزیر اعظم اور وزیر دفاع کے منصب پر بھی فائز ہیں، اب باضابطہ طور پر مسلح افواج میں لیفٹیننٹ جنرل کے عہدے پر فائز ہو چکے ہیں۔

یہ فیصلہ ایسے وقت میں سامنے آیا ہے جب شیخ حمدان کو وفاقی حکومت میں شامل ہوئے ایک سال سے کچھ زائد عرصہ ہوا ہے۔ گزشتہ سال انہیں نائب وزیر اعظم اور وزیر دفاع کا عہدہ سونپا گیا تھا۔

شیخ حمدان نے اپنی عسکری تعلیم برطانیہ کی مشہور رائل ملٹری اکیڈمی سینڈ ہرسٹ سے حاصل کی، جو دنیا کے ممتاز فوجی اداروں میں شمار ہوتی ہے۔

وزارت دفاع میں تقرری کے بعد سے شیخ حمدان نے ملکی اور عالمی سطح پر اہم دفاعی معاملات میں فعال کردار ادا کیا ہے۔ فروری 2025 میں انہوں نے بین الاقوامی دفاعی نمائش (IDEX) میں شرکت کی، جہاں انہوں نے قازقستان اور کویت کے دفاعی حکام سے تربیتی تعاون، ہم آہنگی اور بین الاقوامی شراکت داری پر تبادلہ خیال کیا۔

مارچ میں رمضان المبارک کے دوران انہوں نے ابوظہبی کے سویہان تربیتی مرکز میں قومی سروس کے بھرتی شدہ نوجوانوں کے ساتھ افطار کیا اور ان کے جذبے اور نظم و ضبط کی تعریف کرتے ہوئے قومی سروس کو اتحاد اور طاقت کا ستون قرار دیا۔

اس کے بعد مئی میں شیخ حمدان نے الظفرہ ایئر بیس کا دورہ کیا، جہاں انہوں نے مختلف عسکری یونٹس کا معائنہ کیا، ان کی تیاریوں کا جائزہ لیا اور یو اے ای ایئر فورس اور ایئر ڈیفنس کی تکنیکی ترقی کو سراہا۔