خلیج اردو
دبئی حکام نے منگل کی صبح تصدیق کی ہے کہ کویتی خام تیل بردار جہاز "السالمی” میں لگنے والی آگ پر قابو پا لیا گیا ہے، جبکہ تمام 24 عملے کے ارکان محفوظ رہے اور کوئی جانی نقصان نہیں ہوا۔
دبئی حکومت کے میڈیا آفس کے مطابق امدادی ٹیمیں صورتحال کی مسلسل نگرانی کر رہی ہیں اور تمام ضروری حفاظتی اقدامات جاری ہیں۔ یہ ٹینکر پیر کے روز دبئی پورٹ کے اینکریج ایریا میں لنگر انداز تھا جب اس میں آگ بھڑک اٹھی اور جہاز کے ڈھانچے کو نقصان پہنچا۔
کویت پٹرولیم کارپوریشن نے دعویٰ کیا کہ جہاز کو ایرانی ڈرونز نے نشانہ بنایا، جس کے نتیجے میں مادی نقصان ہوا۔ برطانیہ کی میری ٹائم ٹریڈ آپریشنز کے مطابق ایک نامعلوم شے جہاز کے دائیں حصے سے ٹکرائی جس سے آگ لگی، تاہم ماحولیاتی نقصان کی کوئی اطلاع نہیں ملی۔
حکام کے مطابق فائر فائٹنگ ٹیموں نے بروقت کارروائی کرتے ہوئے آگ پر قابو پایا، جبکہ جہاز کو پہنچنے والے نقصان کا تخمینہ لگایا جا رہا ہے۔
یہ حملہ خلیج اور آبنائے ہرمز میں تجارتی جہازوں پر حالیہ حملوں کے سلسلے کی ایک کڑی ہے، جہاں امریکا اور اسرائیل کی جانب سے ایران پر حملوں کے بعد کشیدگی میں اضافہ دیکھا جا رہا ہے۔
اس سے قبل سعودی عرب کے راس تنورہ کے قریب ایک یونانی کنٹینر جہاز کے پاس بھی دو الگ واقعات میں مشتبہ میزائل پانی میں گرے تھے، تاہم کوئی نقصان رپورٹ نہیں ہوا۔
