خلیج اردو
دبئی – 30 جون 2025ء
دبئی میونسپلٹی نے پیر کے روز راس الخور وائلڈ لائف سینکچری ڈویلپمنٹ پراجیکٹ کا اعلان کیا، جس کا مقصد اس قدرتی ذخیرے میں آنے والے سیاحوں کی سالانہ تعداد کو چھ گنا بڑھا کر 2 لاکھ 50 ہزار سے 3 لاکھ کے درمیان لانا ہے۔
65 کروڑ درہم مالیت کے اس منصوبے کے پہلے مرحلے کا ٹھیکہ دے دیا گیا ہے، جو آئندہ سال کے اختتام تک مکمل کر لیا جائے گا۔ راس الخور وائلڈ لائف سینکچری دبئی کے وسط میں واقع ایک دلدلی قدرتی ذخیرہ ہے، جس میں نمکین میدان، مینگرووز اور جھیلیں شامل ہیں۔ اسے عالمی سطح پر اہم پرندہ گاہ (IBA) کے طور پر تسلیم کیا گیا ہے اور یہ 450 سے زائد نباتات و حیوانات کی اقسام کا مسکن ہے۔
یہ ذخیرہ مختلف پرندوں کو قدرتی ماحول میں دیکھنے کے لیے مخصوص مقامات پر مشتمل ہے، جن میں فلیمنگو ہائیڈ، مینگروو ہائیڈ، گرے ہیئرن، سپون بل، کنگ فشر اور اوسپرے جیسے نایاب پرندے شامل ہیں۔
منصوبے کے پہلے مرحلے میں آبی علاقوں میں 144 فیصد اضافہ کیا جائے گا، جس سے یہ رقبہ بڑھ کر 74 ہیکٹر ہو جائے گا۔ اس اقدام سے نہ صرف قدرتی حسن میں اضافہ ہو گا بلکہ ماحولیاتی طور پر بھی اہم فوائد حاصل ہوں گے، جیسے کہ کاربن ڈائی آکسائیڈ جذب کرنے کی صلاحیت میں 60 فیصد اضافہ۔
اس کے ساتھ ساتھ 10 ہیکٹر نئے نمکین میدان (مڈفلیٹس) بھی شامل کیے جائیں گے، جو ہجرت کرنے والے پرندوں کے لیے خوراک کی فراہمی کے اہم مراکز ہوں گے اور مختلف آبی و نباتاتی حیات کو سہارا دیں گے۔
منصوبے کے دوسرے مرحلے میں سبز علاقوں میں وسعت، مقامی نباتات کی شجرکاری، اور قدرتی ماحولیاتی نظام کی بہتری شامل ہو گی، تاکہ مزید جانوروں اور پرندوں کو یہاں راغب کیا جا سکے۔
علاوہ ازیں، سیاحوں کی سہولت کے لیے واک ویز، پرندہ دیکھنے کے مقامات اور تعلیمی سائن بورڈز کو اپ گریڈ کیا جائے گا، تاکہ ذخیرے کو پائیدار اور دلچسپ انداز میں دریافت کیا جا سکے۔
