اوبر ایپ کے ذریعے دبئی میں ایئر ٹیکسی سروس متوقع

خلیج اردو
دبئی کے رہائشی جلد Uber ایپ کے ذریعے ایئر ٹیکسی سروس بک کر سکیں گے، جس کے تحت برقی فضائی ٹیکسی عام سفری آپشنز کے ساتھ دستیاب ہوگی۔

رپورٹس کے مطابق صارفین منزل درج کریں گے تو اگر سفر موزوں ہوا، ایئر ٹیکسی کا آپشن بھی ظاہر ہوگا، جس میں پریمیم کار پک اپ، پرواز اور آخری ڈراپ آف شامل ہوگا۔

یہ ایئر ٹیکسی چار مسافروں کی گنجائش رکھتی ہے اور اسے مستند کمرشل پائلٹ اڑائے گا جبکہ کیبن میں آرام دہ نشستیں اور شہر کے خوبصورت مناظر کیلئے بڑی کھڑکیاں موجود ہوں گی۔

برقی طیارہ چھ جھکاؤ رکھنے والے پروپیلرز سے عمودی ٹیک آف کر کے آگے پرواز کرے گا، رفتار 200 میل فی گھنٹہ جبکہ ایک چارج پر 100 میل تک فاصلہ طے کر سکے گا۔

رواں سال کے آخر میں دبئی میں پہلی مسافر پروازیں متوقع ہیں، جو شہری ٹرانسپورٹ کے زمینی اور فضائی نظام کے انضمام کی جانب اہم پیش رفت ہوگی۔