خلیج اردو
دبئی میں اچانک موٹر سائیکل موڑنے کے باعث پیش آنے والے حادثے میں عدالت نے ایک ایشیائی شہری کو 4 ہزار درہم جرمانے اور تین ماہ کے لیے ڈرائیونگ لائسنس کی معطلی کی سزا سنا دی۔
رپورٹس کے مطابق دبئی ٹریفک کورٹ نے موٹر سائیکل سوار کو حادثے کا ذمہ دار قرار دیتے ہوئے کہا کہ دورانِ سفر اچانک سمت تبدیل کرنے کے باعث وہ اپنی موٹر سائیکل پر قابو نہ رکھ سکا، جس کے نتیجے میں موٹر سائیکل الٹ گئی اور اسے نقصان پہنچا۔
پولیس ریکارڈ کے مطابق دبئی پولیس کے آپریشن روم کو ایک علاقے میں موٹر سائیکل حادثے کی اطلاع موصول ہوئی، جس کے بعد پولیس ٹیم کو موقع پر روانہ کیا گیا۔
تحقیقات کے دوران پولیس نے جائے وقوعہ کا جائزہ لیا اور حادثے کی وجوہات جاننے کے لیے ٹریفک خاکہ تیار کیا۔ تفتیش سے معلوم ہوا کہ ڈرائیور کی عدم توجہ اور اچانک موڑ حادثے کی بنیادی وجہ تھی۔
مزید جانچ پڑتال کے دوران یہ بھی سامنے آیا کہ موٹر سائیکل کی رجسٹریشن نومبر 2025 میں ختم ہو چکی تھی، جبکہ لازمی انشورنس کی مدت بھی حادثے سے قبل ختم ہو گئی تھی۔
عدالت میں پیشی کے دوران ملزم نے حادثے کی ذمہ داری قبول کرتے ہوئے اپنی غلطی کا اعتراف کیا اور نرمی کی اپیل کی۔
عدالت نے پولیس رپورٹ، ٹریفک خاکے اور ملزم کے اعتراف کو بنیاد بناتے ہوئے فیصلہ سنایا کہ حادثہ کسی بیرونی وجہ سے نہیں بلکہ ڈرائیور کی غفلت کے باعث پیش آیا۔
عدالت نے موٹر سائیکل کو نقصان پہنچانے پر 3 ہزار درہم، میعاد ختم ہونے والی رجسٹریشن کے ساتھ گاڑی چلانے پر 500 درہم اور بغیر انشورنس کے عوامی سڑک پر گاڑی چلانے پر مزید 500 درہم جرمانہ عائد کیا۔
عدالت نے مجموعی طور پر 4 ہزار درہم جرمانے کے ساتھ ملزم کا ڈرائیونگ لائسنس بھی تین ماہ کے لیے معطل کرنے کا حکم دے دیا۔
