دبئی: شیخ حمدان نے نئی فٹنس مہم ’دبئی مالاتھون‘ کا آغاز کر دیا، عوام اب مالز میں چہل قدمی کر کے صحت مند رہ سکیں گے

خلیج اردو
دبئی: دبئی کے ولی عہد شیخ حمدان بن محمد بن راشد المکتوم نے شہریوں کے لیے ایک نئی فٹنس مہم ’دبئی مالاتھون‘ کا آغاز کر دیا ہے، جس کا مقصد شدید گرمی کے موسم میں ایئرکنڈیشنڈ ماحول میں رہ کر عوام کو فعال و صحت مند طرز زندگی اپنانے کی سہولت فراہم کرنا ہے۔

یہ اقدام "دبئی سوشل ایجنڈا 33 اہداف” کا حصہ ہے، جس کے تحت اگست کے پورے مہینے کے دوران صبح 7 بجے سے 10 بجے تک دبئی کے سات بڑے تجارتی مراکز میں واک اور رننگ کے لیے خصوصی راستے مختص کیے جائیں گے۔ ان مراکز میں دبئی مال، دبئی ہلز مال، سٹی سنٹر ڈیرا، سٹی سنٹر مردف، مال آف دی ایمیریٹس، دبئی مرینا مال اور دی اسپرنگز سوک شامل ہیں۔

شیخ حمدان نے عوام سے اپیل کی کہ وہ اس موقع کو استعمال کرتے ہوئے صبح کے وقت آسانی اور تحفظ کے ساتھ ایک صحت مند اور متحرک طرز زندگی اختیار کریں۔ اس مہم کا مقصد ہر عمر، نسل اور طبقے سے تعلق رکھنے والے افراد کو شامل کرنا ہے، جن میں نوجوان، بزرگ، بچے، رہائشی اور مالز میں کام کرنے والے ملازمین شامل ہیں۔

مالاتھون میں شرکاء کے لیے فٹنس ٹریکنگ سسٹمز، ہیلتھ آگاہی اسٹیشنز، بچوں کے لیے مخصوص علاقے، اور رہنمائی پر مبنی اسٹریچنگ ایکسرسائزز کا اہتمام کیا جائے گا، تاکہ ایک مثبت اور حوصلہ افزا ماحول پیدا ہو۔

شیخ حمدان نے کہا، "دبئی مالاتھون کا مقصد سادہ مگر مؤثر طریقے سے شہریوں کو روزمرہ کی مصروفیات کے درمیان فعال رہنے کی ترغیب دینا ہے۔ ہم چاہتے ہیں کہ دبئی کا ہر فرد محسوس کرے کہ وہ آسانی سے اپنی صحت اور توانائی کو برقرار رکھ سکتا ہے۔”

انہوں نے مزید کہا، "یہ سفر ہم سب کا مشترکہ ہے، دبئی کو دنیا کا بہترین شہر بنانے کے لیے ہر قدم اہم ہے۔”

شرکت کا طریقہ:
دبئی مالاتھون میں شرکت مفت ہے اور www.dubaimallathon.ae پر رجسٹریشن کے ذریعے کی جا سکتی ہے۔ رجسٹریشن مکمل کرنے کے بعد شرکاء کو ایک ڈیجیٹل کارڈ جاری کیا جائے گا جو ان کی شرکت کی تصدیق کرے گا۔

اس مہم کے تحت مختلف ریستورانوں اور ریٹیل آؤٹ لیٹس کے ساتھ خصوصی شراکت داری بھی کی گئی ہے، جو صحت مند طرز زندگی کے فروغ کے لیے خصوصی رعایتی آفرز اور متوازن غذائی انتخاب پیش کریں گے۔

مالاتھون کا مقصد مالز کی وسیع مگر غیر استعمال شدہ اندرونی جگہوں کو محفوظ اور متحرک کھیلوں کے ماحول میں تبدیل کرنا ہے تاکہ شدید گرمی کے موسم میں بھی شہری اپنی جسمانی فٹنس برقرار رکھ سکیں۔

شیخ حمدان دبئی میں فٹنس کلچر کے فروغ کے حوالے سے جانے جاتے ہیں، جن کی سرپرستی میں ہر سال دبئی رن اور دبئی فٹنس چیلنج جیسے بڑے ایونٹس منعقد ہوتے ہیں، جہاں شہری 30 دن تک روزانہ 30 منٹ ورزش کرتے ہیں۔